कञ्चनपुर ।  महेन्द्रनगरमा सोमबारदेखि जिल्ला लिग फुटबल प्रतियोगिता शुरु भएको छ । 

कञ्चनपुर जिल्ला फुटबल सङ्घको आयोजना र भीमदत्त नगरपालिकाको सहयोगमा शुरु गरिएको प्रतियोगिताको एक कार्यक्रमकाबीच भीमदत्त नगरपालिकाका प्रमुख पदम बोगटीले उद्घाटन गर्नुभयो ।

महेन्द्रनगरस्थित खुल्ला मञ्चमा भएको पहिलो खेल दीपज्योति युवा क्लब र अरनिको युवा क्लबबीच बराबरीमा टुङ्गिँदा समान एक÷एक अङ्कमा बाँडेका छन् । कञ्चनपुर जिल्ला फुटबल सङ्घका महासचिव नितेश रावलले निर्धारित समयमा गोलरहित हुँदा दुवै टोलीले अङ्क बाँडेका जानकारी दिनुभयो ।

सोमबारको दोस्रो खेलमा निङ्गलाशैनी विकास समाजले विजयी सुरुआत गरेको छ । निङ्गलाशैनीले द ग्यालेक्सी युवा क्लबलाई ३–२ गोलले पराजित गर्दै आफ्नो विजयी यात्रा शुरुवात गरेको हो । 

आज रोयल गोर्खाज स्पोर्टस् क्लब र आदर्श समाज, कञ्चन समाज र महेन्द्रनगर युनाइटेड तथा अन्तिम खेल त्रिपुरा समाज र राम युवा क्लबबीच हुने आयोजकले जनाएको छ ।

प्रतियोगिताको उपाधि विजेता टोली ५१ हजार १ सय ११ रुपैयाँ, उपविजेता टोलीले २५ हजार ५ सय ५५ रुपैयाँ र सान्त्वना पुरस्कार स्वरुप ११ हजार १ सय ११  रुपैयााँसहित पुरस्कृत हुनेछन् । 

अखिल नेपाल फुटबल सङ्घ (एन्फा) वार्षिक कार्यतालिकाअनुसार भइरहेको प्रतियोगितामा ११ टोली सहभागी छन् ।