तनहुँ । गण्डकी प्रदेश सरकारबाट बजेट विनियोजन भएर तनहुँमा गत र चालु आर्थिक वर्षमा गरी सात वटा पक्की पुल निर्माण सम्पन्न भएका छन् । गत आवमा पाँच र चालु आवमा दुई गरी सातवटा मोटरेबल पुल बनेका हुन् । 

त्यस्तै ११ वटा पक्की पुल निर्माणाधीन  रहेका पूर्वाधार विकास कार्यालय तनहुँका इन्जिनियर धनमाया मिश्रले जानकारी दिनुभयो । निर्माणाधीन पुलका लागि  २२ करोड ७५ लाख  रुपैयाँ  विनियोजन भएकामा ३ करोड २६ लाख २१ हजार  रुपैयाँ खर्च भएको छ । 

 चालु आवमा ऋषिङ गाउँपालिका–५ रुपाटारस्थित लुम्दीखोलामा ३० लाख रुपैयाँमा पुल निर्माण सम्पन्न भएको छ । म्याग्दे गाउँपालिकास्थित बेलसोती मार्गको म्याग्दे खोलामा  ३० लाखको लागतमा अर्को पुल बनाइएको छ । 

गत आवमा ५० लाख रुपैयाँमा भिमाद नगरपालिका–८ र शुक्लागण्डकी नगरपालिका–८ र शुक्लागण्डकी नगरपालिका–८ जोड्ने क्याङ्दीखोलामा  ५० लाख, ऋषिङ–४ र ५ जोड्ने रुपाटार जोड्ने ज्वालाखोलामा३० लाखमा, घिरिङ गाउँपालिका–४ नयाँटारमा तिरम्दीखोलामा  ३० लाख, घिरिङ गाउँपालिका–१ द्रुपद खोलामा  ३० लाख र आँबुखैरेनी गाउँपालिका–३ र ४ सिउदीखोलामा  ५० लाख रुपैयाँमा पुल बनेका हुन् । 

 इन्जिनियर मिश्रका अनुसार चालु आवमा निर्माणाधीनमध्ये आँबुखैरेनी गाउँपालिका–२ र ३ जोड्ने खहरेखोलामा ७५ लाख रुपैयाँ विनियोजन गरिएको छ । दमौली बिसेघरे झापुटारस्थित सेती नदीमा ४ करोड रुपैयाँमा पुल निर्माणाधीन  छ ।

शुक्लागण्डकी नगरपालिका–५ र ८ जोड्ने सेती नदीमा ३ करोड, बन्दीपुरस्थित खुदीखोलामा १  करोड, व्यास नगरपालिका–११ स्थित बुल्दीखोलामा १  करोड ५० लाख, शुक्लागण्डकी नगरपालिका–१० र भिमाद नगरपालिका–८ जोड्ने क्याङ्दीखोलामा १ करोड ५० लाख, म्याग्दे गाउँपालिका–४ मिन मावि पछाडि म्याग्देखोलामा १ करोड ७० लाख रुपैयाँमा पुल निर्माणाधीन छ । 

यसैगरी, भिमाद नगरपालिका–३ बुडुवाखोलामा ४० लाख, भिमाद नगरपालिका–५ स्थित बुडुवाखोलामा १  करोड, भिमाद नगरपालिका–१ डुम्रीवेँसीमा १ करोड ४० लाख र बन्दीपुर गाउँपालिका–१ र भानु नगरपालिका–१ जोड्ने तल्लो डुम्रेमा ५० लाख रुपैयाँमा पुल बनिरहेको छ ।