काठमाडौँ ।  इजरायल-हमास युद्धका कारण गाजा क्षेत्रमा भइरहेको नरसंहारका विरुद्ध काठमाडौंमा विरोध प्रदर्शन भएको छ । नागरिक समाज, राजनीतिक दलका नेता कार्यकर्ता र मानव अधिकारवादीहरूले सोमबार काठमाडौँको शान्तिवाटिकामा जम्मा भएर र्‍यालीसहित गाजा क्षेत्रमा इजरायलले गरिरहेको नरसंहारको विरोध गरेका छन् ।

प्रदर्शनमा सहभागिहरुले इजरायल र प्यालेस्टाइनको इतिहासमै नभएको नरसंहार अहिले भइरहेको भन्दै त्यसलाई तत्काल रोक्नका लागि समेत अपिल गरेका छन् । सोमबार विरोध र्‍यालीसहित शान्तिवाटिकाबाट इजरायली दूतावास लाजिम्पाट पुगेर त्यसबारे ज्ञापनपत्र बुझाउने कार्यक्रम भएपनि प्रहरीको अवरोधका कारण विरोध र्‍याली लाजिम्पाटतर्फ भने जान पाएन । आफूहरूले मानव अधिकारकोविरुद्ध गाजामा भइरहेको जनसंहारका विरुद्ध तत्काल युद्धविराम र गाजामा लगाइएको नाकाबन्दी खोलेर जनजीवन सामान्य बनाउन अपिल गरेको संयुक्त अभियानका संयोजक श्याम श्रेष्ठले बताउनुभयो । 

गतवर्ष इजरायलमा हमासको आक्रमणपछि इजरायलले गाजा क्षेत्रमा निरन्तर हमला गर्दै आएको छ । इजरायली आक्रमणका कारण अहिलेसम्म ४४ हजारभन्दा धेरै प्यालिस्टिनीहरूले ज्यान गुमाइसकेका छन् । संयुक्त राष्ट्र संघको अध्ययन अनुसार त्यसमध्ये ७० प्रतिशत महिला र बालबालिका रहेका छन् ।