काठमाडौँ ।  माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल प्रचण्डले सय दिनमा सरकार असफल भएपनि तत्काल आफू सरकार ढाल्ने पक्षमा नरहेको बताउनुभएको छ । उहाँले सरकार ढाल्नतर्फ लाग्दा फेरि जनतामा हैरानी हुने भन्दै माओवादी सरकार ढाल्ने पक्षमा नरहेको उल्लेख गर्नुभयो । 

अध्यक्ष प्रचण्डले मंगलबार न्युज एजेन्सी नेपालसँग कुरागर्दै सरकारको सय दिन पूर्णरुपमा असफल रहेको उल्लेख गर्नुभयो । 

"फेरि सरकार त बनेकै छ । मैले यो कुरा पनि भनेको छु की सरकार राष्ट्र र जनताप्रति अझ गम्भीर र संवेदनशील होस् । र सकारात्मक काम गरेर जाओस् भन्ने छ । यो सरकार अहिले नै ढाल्नुपर्छ भन्ने माओवादी केन्द्रको र मेरो कुनै मनशाय छैन । किनभने त्यसो गरेर फेरि जनतालाई हैरान पार्ने भन्दा यही सरकारले राम्रो गर्दिए हुन्थ्यो भन्ने छ," अध्यक्ष प्रचण्डले भन्नुभयो । 

उहाँले सरकार निर्माणको प्रक्रिया नै सही विधि र प्रक्रियाबाट नभएको गुनासो गर्दै सरकार निर्माणको उद्देश्य नै गलत रहेको जिकिर प्रष्ट पार्नुभयो । "यो सरकारले राष्ट्र र जनताको पक्षमा धेरै गर्न सम्भव छैन भन्नेकुरा त मैले शुरुमा नै भनेको थिएँ। सरकार गठनको हिसावले, प्रक्रियाको हिसावले, समयको हिसावले, ठाउँको हिसाबले भनेर भनेको थिएँ । नभन्दै सय दिनसम्मको हेर्दा यो सरकार सफल भएको मान्न सकिँदैन । सरकार असफल नै छ । तर फेरि सरकार त बनेकै छ । मैले यो कुरा पनि भनेको छु की सरकार राष्ट्र र जनताप्रति अझ गम्भीर र संवेदनशील होस्" अध्यक्ष प्रचण्डले भन्नुभयो । 

-न्युज एजेन्सी नेपाल