भक्तपुर । भक्तपुरमा बस दुर्घटनामा १० जना घाइते भएका छन् । घाइते मध्ये २ जनाको अवस्था गम्भीर छ । 

चाँगुनारायण नगरपालिकाको तेलकोटबाट यात्रु बोकेर आएको प्रदेश–३–०१–००६ ख ०३१२ नम्बरको बसआज खरिपाटीस्थित घुमाउनेमा दुर्घटना भएको हो । दुर्घटनामा १० जना यात्रु घाइते भएका छन् । 

नगरपालिका कार्यालयसँगै घुमाउनेमा तीव्र गतिमा आएको  बस अनियन्त्रित भई सडकको खम्बामा ठोक्किएर दुर्घटना भएको जिल्ला ट्राफिक प्रमुख प्रदीप खत्रीले जानकारी दिनुभयो । खत्रीका अनुसार घाइतेको भक्तपुर अस्पतालमा उपचार भइरहेको छ । 

दुर्घटनाका प्रत्यक्षदर्शी गोकर्ण पुरीले बस दुर्घटनामा घाइतेको आफूहरुले उद्धार गरी एम्बुलेन्समा हालेर भक्तपुर अस्पताल पठाएको र अगाडि बस्ने दुईजनाको अवस्था भने गम्भीर रहेको जानकारी दिनुभयो । 

बस खम्बामा ठोक्किएर दुर्घटना हुँदा विद्युत्को खम्बा समेत भाँचिएको उहाँले जानकारी दिनुभयो ।