बाग्लुङ । राष्ट्रिय गौरवको आयोजना लोकमार्ग अलपत्र पार्ने निर्माण कम्पनी कालोसूचीमा परेको छ । मध्यपहाडी लोकमार्गअन्तर्गत बाग्लुङको बिहुँ–घोडाबाँधे खण्ड अधुरै छाड्ने निर्माण कम्पनी कालोसूचीमा परेको हो । 

लोकमार्ग कालोपत्रेका लागि  २०७२ माघमा जिम्मा पाएको एमपी/एससीएफ/इसिसी जेभीलाई वर्षौँसम्म काम नगरेपछि कालोसूचीमा राखिएको हो । ३ वर्षमा निर्माण सम्पन्न गर्नेगरी सम्झौता भए पनि ८ वर्षसम्म काम नगर्दा सार्वजनिक खरिद अनुगमन कार्यालयले पत्रिकामा सूचना प्रकाशन गरी  त्यो निर्माण कम्पनीलाई कालोसूचीमा राखेको हो । 

सार्वजनिक खरिद ऐन र नियमावलीअनुसार समयमै काम नगर्ने निर्माण कम्पनी/व्यवसायीलाई एक वर्षदेखि तीन वर्षसम्म कालोसूचीमा राख्ने प्रावधान छ । त्यहीअनुसार लोकमार्ग अलपत्र पार्ने निर्माण कम्पनीलाई अधिकतम ३ वर्षका लागि कालोसूचीमा राखिएको  मध्यपहाडी लोकमार्ग कार्यालय पर्वतका सूचना अधिकारी इञ्जिनियर पवन सुवेदीले जानकारी दिनुभएको छ । 

काठेखोला गाउँपालिकाको बिहुँदेखि घोडाबाँधेसम्मको १२ किलोमिटर सडक भारत पश्चिम बङ्गालको एमपी सितानी एण्ड सन्स, सूर्य कन्स्ट्रक्सन फर्म सुर्खेत र एलिट कन्स्ट्रक्सन प्रालि सुकेधारा, काठमाडौँले संयुक्तरुपमा ठेक्का लिएका थिए । हालसम्म त्यो सडकको ७४ प्रतिशत प्रगति भएको इञ्जिनियर सुवेदीको भनाई छ । 

२०७५ साल माघमा सक्नुपर्ने सडकको काम पाँच पटकसम्म म्याद थप गरिएको थियो ।  २०८० साल असार ५ गतेसम्म काम नगरेपछि लोकमार्ग कार्यालयले गएको असार १० गते ठेक्का सम्झौता अन्त्य गरी कालोसूचीमा राख्न सार्वजनिक कार्यालयलाई खरिद अनुगमन पत्र पठाएको इञ्जिनियर सुवेदीले बताउनुभयो । त्यस खण्डमा ५ किलोमिटर मात्र कालोपत्र गरिएको छ । ७ किलोमिटर कालोपत्र गर्न अझै बाँकी रहेको उहाँको भनाई छ । 

‘लोकमार्गको यो खण्डमा लामो समयसम्म काम भएन, विभिन्न बहानामा निर्माण कम्पनीले काम गरेन, पाँच पटकसम्म म्याद पनि थपियो । काम नगरेपछि कालोसूचीमा राखिएको हो’ इञ्जिनियर सुवेदीले भन्नुभयो– ‘नयाँ ठेक्काका लागि प्रक्रिया अगाडि बढाइएको छ । बजेटको व्यवस्था भएलगत्तै काम शुरुहुन्छ ।’ लोकमार्ग कालोपत्र नहुँदा हिउँदमा धुलो र बर्खामा हिलोले यात्रु र स्थानीय आजित छन् ।