काठमाडौँ । विमान चालककै शैक्षिक प्रमाणपत्र नक्कली  रहेको पाइएको छ । सर्टिफिकेट’ नक्कली पाइएपछि विमान चालक  सम्राटबहादुर शाहविरुद्ध विशेष अदालतमा मुद्धा परेको छ । 

विमान चालक शाहविरुद्ध अख्तियार दुरुपयोग अनुसन्धान आयोगले आरोपपत्र दायर गरेको हो । २०७१ फागुन १० गतेदेखि जुनियर क्याप्टेन पदमा नियुक्त भई आठौँ तहको क्याप्टेन पदमा बढुवा भएका चालक शाहीले बढुवा प्रयोजनका लागि नक्कली शैक्षिक प्रमाणपत्र पेश गरेको पाइएको अख्तियारका प्रवक्ता नरहरि घिमिरेले जानकारी दिनुभएको छ । प्रवक्ता  घिमिरेका अनुसार शाहका शैक्षिक प्रमाणपत्रका विषयमा आयोगमा उजुरी परेपछि छानविन गर्दा नक्कली पुष्टि भएको हो । 
  
शाहले भारतको उत्तरप्रदेशस्थित सेकेन्डरी एजुकेशन काउन्सिलअन्तर्गत भिएसजे इन्टरकलेज गोरखपुरबाट प्रवीणता परीक्षामा प्रथम श्रेणी हासिल गरेको झूठो प्रमाणपत्र पेश गरेको प्रवक्ता घिमिरेले बताउनुभयो ।