काठमाडौँ । उपप्रधानमन्त्री एवं गृहमन्त्री नारायणकाजी श्रेष्ठले शुक्रबार ललितपुरको बालकुमारीमा मानवीय तथा भौतिक क्षति हुने गरी भएको घटनाका दोषीलाई कारबाही गरिने प्रतिवद्धता व्यक्त गर्नुभएको छ । 

प्रतिनिधिसभा, राज्यव्यवस्था तथा सुशासन समितिको सोमबारको बैठकमा उहाँले छानविनबाट दोषी ठहरिएकालाई कारबाहीको दायरामा ल्याइने प्रतिवद्धता जनाउनुभयो । 

घटनाको निष्पक्ष र वस्तुगत छानविन गर्न सरकारले जाँचबुझ आयोग ऐन, २०२६ अनुसार सरकारले पूर्वन्यायाधीशको संयोजकत्वमा आयोग गठन गरेको जानकारी दिँदै उहाँले आयोगले घटनाको सबै पक्षमा छानविन गर्ने विश्वास दिलाउनुभयो । ‘ घटना अनपेक्षित र दुःखद् घटना हो, दोषीलाई कारबाही हुन्छ । यसप्रकारका घटना नदोहारिन सरकार तयार र थप जिम्मेवार छ’ उहाँले भन्नुभयो– आयोगले विस्तृत अनुसन्धान गर्नेछ, आयोगको सिफारिस कार्यान्वयन गरिनेछ ।’
 
उपप्रधानमन्त्री श्रेष्ठले मृतकका परिवारलाई आर्थिक सहयोग थप गर्नेबारेमा पनि सरकार परामर्शमा रहेको बताउनुभयो । ‘मृतकका परिवारलाई जनही १० लाख दिने प्रारम्भिक निर्णय हो, इपिएस कोष र वैदेशिक रोजगार बोर्डमार्फत थप सहयोग गरिनेछ’ उहाँले भन्नुभयो । मृतकका परिपवारलाई योग्यता अनुसारको रोजगारी सरकारले नै उपलब्ध गराउने उहाँको भनाई छ ।’