कर्णाली ।  कर्णाली प्रदेश सरकारले चालु आर्थिक वर्षमा वार्षिक खर्च प्रगति ६० दशमलव ३४ प्रतिशत गरेको छ ।

चालु आवमा प्रदेश सरकारले  ३३ अर्ब ३७ करोड ९७ लाख ७ हजार रुपेयाँ बजेट ल्याएको थियो । प्रदेश सरकारद्वारा चालु आवका लागि विनियोजित कूल बजेटमा २० अर्ब १५ करोड ३९ लाख ७३ हजार १ सय ६२ (६० दशमलव ३४ प्रतिशत)  खर्च गरेको प्रदेश लेखा नियन्त्रक कार्यालय सुर्खेतका कायममुकायम प्रदेश लेखा नियन्त्रक दीपेन्द्र मगरातीले जानकारी दिनुभएको छ । 

त्यसमा चालुतर्फ ९ अर्ब ४५ करोड ८३ लाख २६ हजार सात सय ९७ (६८ दशमलव ३६) र पुँजीगततर्फ १० अर्ब ६९ करोड ५६ लाख ४६ हजार ३ सय ६५ रुपैयाँ  (५४ दशमलव ६७ प्रतिशत) खर्च भएको उहाँले बताउनुभयो । 

‘गत आव ०७९ र ०८० मा प्रदेश सरकारले ६७ दशमलव ५३ प्रतिशत वार्षिक खर्च प्रगति गरेको थियो’ उहाँले भन्नुभयो– ‘चालु आवमा भने वार्षिक खर्च प्रगति करिब ८ प्रतिशतले घटेको छ । गत आवमा चालु खर्च ७२ दशमलव ४० प्रतिशत हुँदा चालु आवमा ६८ दशमलव ३६ प्रतिशत मात्र खर्च भएको छ ।’

 नियन्त्रक मगरातीका अनुसार गत आवमा पुँजीगत खर्च प्रगति ६४ दशमलव ३२ प्रतिशत थियो । चालु आवमा ५४ दशमलव ६७ प्रतिशत मात्र भएको छ ।

चालु आर्थिक वर्षमा वार्षिक खर्च प्रतिशत कम हुनुमा  १५ लाख रुपैयाँ मुनिका पूर्वाधार निर्माणका काम नहुनु, कर्णाली समृद्धि आयोजना कार्यान्वयनमा नआउनु, सांसद विकास क्षेत्र पूर्वाधार विकास कार्यक्रमको अदालतमा मुद्दा पर्नु र केही हदसम्म कर्णालीमा जनशक्ति अभाव लगायत कार रहेको उहाँले बताउनुभयो ।