काठमाडौँ ।  अविरल वर्षाका कारण देशका विभिन्न भागमा बाढीपहिरोमा परेर हालसम्म ७८ जनाले ज्यान गुमाएका छन् । बाढीपहिरोबाट  १० करोड रुपैयाँ भन्दा बढीको क्षति भएको छ । 

प्रहरी प्रधान कार्यालयका अनुसार गएको जेठ २८ गतेदेखि हालसम्म देशका विभिन्न स्थानमा आएको बाढीपहिरोमा परेर  जीवन गुमाउनेको संखया आज बिहानसम्म ७८ पुगेको छ ।  बाढीपहिरोमा ५ जना बेपत्ता भएका छन् ।  ९० जना घाइते  भएका छन् । 
 
बाढीपहिरोका कारण ३ सय ८१ पशु चौपायको मरेका छन् ।  ९८ गोठमा क्षति भएको छ ।  ८ सय ९५ घर विस्थापित भएका छन् । 

प्रहरी प्रधान कार्यालयका अनुसार विपद् व्यवस्थापनमा ५ हजार ४१ प्रहरी परिचालन गरिएको छ । बाढीपहिरोले एक विद्यालय र दुई सरकारी भवनमा क्षति पुगेको छ  । ४१ वटा पुल बगाएको छ । एक सय ६१ घर डुबानमा परेका र एक सय १६ रोपनी जग्गा पुरिएको प्रहरी प्रधान कार्यालयले जनाएको छ ।
     
अविरल वर्षाका कारण देशभर एक हजार २८ घटना भएका र त्यसबाट  १० करोड १८ लाख ८५ हजार ७ सय  रुपैयाँ  बराबरको क्षति पुगेको प्रहरीले जनाएको छ ।