बैतडी । केही दिनदेखि भइरहेको वर्षासँगै यहाँका किसानलाई रोपाइँको चटारो छ । आकाशे पानीमा निर्भर यहाँका किसान वर्षासँगै रोपाइँमा व्यस्त छन् । 

दोगडाकेदार–३ श्रीकोटका गणेशसिंह विष्टले सिँचाइ सुविधाको अभावमा आकाशे पानीको भर पर्ने यहाँका किसान धमाधम रोपाइँ गर्न लागेको बताउनुभयो । उहाँले भन्नुभयो– ‘सिँचाइ सुविधा नभएर आकाशे पानीको भरमा थियौँ, वर्षा भएसँगै रोपाइँको चटारो परेको छ ।’ 

जिल्लामा धानखेती हुने क्षेत्रमध्ये ४० प्रतिशतमा मात्रै सिँचाइ सुविधा पुगेको छ । कृषि ज्ञान केन्द्र बैतडीका प्रमुख घनश्याम चौधरीले वर्षा भएसँगै धमाधम रोपाइँ भइरहेको बताउनुभयो । जिल्लामा हालसम्म ७० प्रतिशत रोपाइँ सम्पन्न भएको पनि उहाँले जानकारी दिनुभयो । ‘सिँचाइ सुविधा भएका ठाउँमा यसअघि नै रोपाइँ सम्पन्न भइसकेको छ । आकासे पानीको भरमा रहेका किसान हाल रोपाइँमा व्यस्त छन्’ कार्यालय प्रमुख चौधरीले भन्नुभयो ।   

समयमा वर्षा नहुँदा यस वर्ष रोपाइँ गर्न ढिलाइ भएको छ । गत वर्ष असार मध्यसम्म ८५ प्रतिशत धान रोपाइँ सम्पन्न भएकामा यस वर्ष ७० प्रतिशतमात्रै भएको केन्द्रले जनाएको छ । 

जिल्लाको पाटन नगरपालिका क्षेत्रका पाटनसेरा, डिलाशैनीको गोकुलेश्वर, सिगासको ढुङ्गाड, मेलौलीको सलेना, पञ्चेश्वरको महाकालीसँग जोडिएको क्षेत्र, दशरथचन्द नगरपालिकाको महाकालीसँग जोडिएका क्षेत्र र सुर्नयाको सुर्नया नदीसँग जोडिएका क्षेत्रलाई धान पकेट क्षेत्रका रूपमा लिने गरिएको छ ।

बैतडीमा पछिल्लो समयमा धानखेती हुने जमिन घट्दै गएको छ । पछिल्लो कृषि गणनानुसार यहाँ ५ हजार २ सय २५ हेक्टर जमिनमा मात्रै धानखेती हुने गरेको छ । यसअघि ९ हजार हेक्टर जमिनमा धानखेती हुँदै आएको थियो ।