म्याग्दी ।  ट्रयाक खुलेको १८ वर्षपछि म्याग्दीको सदरमुकाम बेनी हुँदै हाँडेभिर–बगरफाँट–भकिम्ली जोड्ने सात किलोमिटर कृषि सडकको स्तरोन्नति शुरु भएको छ । 

विसं २०६३ मा ट्रयाक खुलेको सात किलोमिटर लामो सडकको बगरफाँट–दूधेखोला खण्डको ३ किलोमिटर सडक ग्राभेल र दुधेखोलाबाट भकिम्लीतर्फको ३ सय ९० मिटर सडक ढलान गर्न थालिएको हो ।

भौतिक पूर्वाधार मन्त्रालयअन्तर्गत पूर्वाधार विकास कार्यालयले ५ करोड ५९ लाख रुपैयाँको लागतमा सडक निर्माण पूरा गरिने जनाएको छ । जिल्ला पूर्वाधार विकास कार्यालयका सबइन्जिनियर रविन चोखालका अनुसार हाँडेभिरबाट बगरफाँटको बुद्ध एकेडेमीसम्म दुई किलोमिटर कालोपत्र भइसकेको छ । उहाँले भन्नुभयो– ‘आगामी १८ महिनामा बगरफाँटबाट दुधेखोलासम्मको ३ किलोमिटर सडक ग्राभेल र दुधेखोलाबाट भकिम्लीतर्फको ३ सय ९० मिटर सडक ढलान गर्ने लक्ष्य छ ।’

गण्डकी प्रदेश सरकारले चालु आवमा २  करोड रुपैयाँ  यस सडकलाई विनियोजन गरेको र बहुवर्षीय ठेक्का लगाउन  १० करोड रुपैयाँको स्रोत सुनिश्चितता भइसकेको गण्डकी प्रदेशसभा सदस्य हरिबहादुर भण्डारीले बताउनुभयो । यो सडक बेनी नगरपालिकाको वडा नम्बर २ बगरफाँट, वडा नम्बर ३ भकिम्ली, मङ्गला गाउँपालिकाको ३ र ४ नम्बर वडाका बासिन्दा तथा  पश्चिम म्याग्दीको मालिका गाउँपालिका–५ ओखरबोटको सोलेडाँडा भएर बागलुङको तमान, लामेलासम्म विस्तार गर्ने लक्ष्य छ ।