पोखरा । अविरल वर्षाको कारण पहिरोमा परेर कास्कीमा दुई छुट्टाछुट्टै घटनामा  २ जना बालबालिकाको मृत्यु भएको छ । पहिरोको कारण  १ जना घाइते भएका छन् । 

मादी गाउँपालिका–५ चितेपानी घुम्तीमा मंगलबार  राति  पहिरोमा पुरिएर १३ वर्षीया आयुस्मा रानाभाटको मृत्यु भएको जिल्ला  प्रहरी नायव उपरीक्षक वसन्तकुमार शर्माले जानकारी दिनुभएको छ ।  घटनामा ७० वर्षीया हजुरआमा लालमाया बन्जाराको उद्धार गरिएको छ । घटना घटेका बेला घरमा नातिनी र हजुरआमा मात्र रहेका थिए । इलाका प्रहरी कार्यालय शिशुवाको टोलीले लालमायाको उद्धार गरेको हो ।

यसैगरी मंगलबार राति नै पोखरा महानगरपालिका–२७ आरुपाटामा हरि सुनारको दुई कोठाको कच्ची घर पहिरोले भत्किँदा उनका ३ वर्षीय छोरा अनमोलको मृत्यु भएको छ ।

घटनामा सुनारकी श्रीमती २७ वर्षीया रितु घाइते भएकी प्रहरी नायव उपरीक्षक शर्माले बताउनुभयो । रितु को गण्डकी मेडिकल कलेजमा उपचार भइरहेको छ ।घटनामा हरि र उनका ९ वर्षीया छोरी अञ्जलीको सकुशल उद्धार गरिएको छ ।  पोखरामा मंगलबार रातिदेखि  वर्षा भइरहेको छ ।