काठमाडौँ  । विनियोजित बजेटमाथिको छलफलको क्रममा प्रतिनिधिसभा बैठकमा सांसदहरुले विभिन्न सवाल उठाएका छन् । 

केही क्रसर र खानी उद्योग बन्द हुँदा नेकपा एकीकृत समाजवादीका सांसद मेटमणी चौधरीलाई चिन्ता लागेको छ ।  पूर्वमन्त्री समेत रहनुभएका चौधरीले बुधबारको बैठकमा कानुनसम्मत् दर्ता भएका क्रसर र खानी उद्योगको नवीकरण गर्नुपर्ने बताउनुभएको छ । क्रसर व्यवसायीबाट ६ अर्ब रुपैयाँ राजस्व प्राप्त भइरहेको उहाँको भनाइ छ । 

बैठकमा स्वतन्त्र सांसद डा अमरेशकुमार सिंहले आन्दोलनरत कवाडी व्यवसायीमाथि लाठीचार्ज हुनु दुःखद भएको बताउनुभयो । आन्दोलनका क्रममा घाइते भएकाको उपचार निःशुल्क गर्न उहाँले माग गर्नुभयो ।

आम जनता पार्टीका अध्यक्ष प्रभु साहले शान्तिपूर्ण आन्दोलनमा रहेका कवाडी व्यवसायीमाथि लाठीप्रहारको घटनाप्रति सरकारको ध्यानाकर्षण गराउनुभयो । 

नेकपा एमालेका सांसद एकनाथ ढकालले गोरखाको  भिमसेन थापा गाउँपालिका र धादिङको त्रिपुरासुन्दरी जोड्ने झोलुङ्गे पुल हालसम्म मर्मत हुन नसकेकोप्रति सरकारको ध्यानाकर्षण गराउनुभयो ।