काठमाडौँ । वैदेशिक रोजगारीको प्रलोभन देखाएर १५ करोड रुपैयाँ ठगी गर्ने ३ जना पक्राउ परेका छन्  । 

उपत्यका अपराध अनुसन्धान कार्यालयको टोलीले वैदेशिक रोजगारीको प्रलोभन देखाएर  १५ करोड रुपैयाँ ठगी गर्ने कार्यमा संलग्न रहेको अभियोगमा ३ जनालाई पक्राउ गरी आज सार्वजनिक गरेको छ ।  पोखरा महानगरपालिका–८ का पवन पन्त, भरतपुर महानगरपालिका–१८ चितवनका राजकुमार भट्ट र नवीन विकलाई पक्राउ गरी  उपत्यका अपराध अनुसन्धान कार्यालयले आज पत्रकार सम्मेलन गरेर सार्वजनिक गरेको हो । 

पक्राउ परेकाहरुले तीनरचार वर्षयता कम्तीमा पनि तीन सय जनाभन्दा बढीलाई वैदेशिक रोजगारीको प्रलोभन देखाएर ठगी गरेको देखिएको उपत्यका अपराध अनुसन्धान कार्यालयका प्रहरी उपरीक्षक अङ्गुर जिसीले जानकारी दिनुभयो ।

उहाँले भन्नुभयो–  ‘ठगी गर्ने समूहको मुख्य नाइके राजकुमार भट्ट देखिएको छ, भने पवन पन्त र नवीन विक सहायक ठग भएको हाम्रो अनुसन्धानको क्रममा देखिएको छ, त्यही ठगीमा संलग्न केही व्यक्ति अहिले पूर्पक्षका लागि कारागारमा रहेका छन् ।’

पक्राउ परेकाहरुले तीन सय जनाभन्दा बढी मानिसबाट ५ लाखदेखि  १० लाख रुपैयाँका दरले  १५ करोडभन्दा बढी रकम ठगी गरेको पाइएको हो  । उनीहरुले फेसबुक म्यासेन्जर, ह्वाट्सएप लगायतका सामाजिक सञ्जालमा नक्कली आइडी खोलेर वैदेशिक रोजगारीका लागि कम्बोडिया, न्यूजिल्याण्ड, फ्रान्सलगायतका देशमा लैजाने भनेर विज्ञापन गर्दै जागिरका लागि आउनेबाट रकम ठगी गर्ने गरेको पाइएको प्रहरीको भनाइ छ ।