धनुषा ।  मधेसका नवनियुक्त मुख्यमन्त्री सतिशकुमार सिंह र  मन्त्रीहरुले पद तथा गोपनीयताको शपथग्रहण गर्नुभएको छ । 

मुख्यमन्त्री सिंहले आज दिउँसो प्रदेश प्रमुख सुमित्रा भण्डारीसमक्ष शपथग्रहण गर्नुभएको हो । यसैबीच मुख्यमन्त्री सिंहले सत्ता गठबन्धनका अन्य दलसहित १४ सदस्यीय मन्त्रिपरिषद् गठन गर्नुभएको छ । उहाँहरू सबैले आजै शपथ ग्रहण गर्नुभएको छ । 

अर्थमन्त्रीमा नेकपा माओवादी केन्द्रको  प्रदेश संसदीय दलका नेता भरतप्रसाद साह र युवराज भट्टराई उद्योग, वाणिज्य तथा पर्यटनमन्त्री नियुक्त हुनुभएको छ ।

नेकपा एमालेबाट संसदीय दलका नेता सरोजकुमार यादव भौतिक पूर्वाधार विकास मन्त्री, राजकुमार लेखी शिक्षा तथा संस्कृति, शत्रुधनप्रसाद सिंह स्वास्थ्य तथा जनसङ्ख्या तथा केशव राय स्वास्थ्य राज्यमन्त्री र शारदादेवी थापा शिक्षा तथा संस्कृति राज्यमन्त्रीमा नियुक्त हुनुभएको छ । 

नेकपा एकीकृत समाजवादीका तर्फबाट संसदीय दलका नेता नेता गोविन्दबहादुर न्यौपाने भूमि व्यवस्था, कृषि तथा सहकारीमन्त्री, बेची लुङ्गेली ऊर्जा, सिँचाइ र खानेपानीमन्त्री, नेपाल सङ्घीय समाजवादी पार्टीका तर्फबाट विमला अन्सारी गृह, सञ्चार तथा कानुनमन्त्री र नागरिक उन्मुक्ति पार्टीकी उर्मिलादेवी सिंहलाई श्रम तथा यातायातमन्त्रीको जिम्मेवारी दिइएको छ ।