दाङ । दाङमा गुठी पीडितमाथि प्रहरीले अश्रुग्याँस प्रहार गरेको छ । 

नापी र मालपोत कार्यालयमा तालाबन्दी गर्न गएका स्वर्गद्वारी गुठी पीडित किसान र प्रहरीबीच झडप भएको हो  । प्रहरीले खुलाउन  बल प्रयोग गरेपछि झडप भएको हो । झडपमा ४ जना घाइते भएका छन् । घाइतेको राप्ती स्वास्थ विज्ञान प्रतिष्ठानमा उपचार भइरहेको छ । 

गुठी पीडितहरुले आफ्ना माग सम्बोधन नभएको भन्दै  घोराही स्थितमालपोत र नापी कार्यालयमा तालाबन्दी गर्न गएका हुन्  । तालाबन्दी गर्ने क्रममा गुठी पीडितहरुले कार्यालय घेराउ गरे ।  प्रहरीले कार्यालय खुलाउने क्रममा बल प्रयोग गरेपछि स्थिति तनावग्रस्त बनेको हो । स्थिति साम्य पार्न प्रहरीले गुठी पीडितहरुमाथि अश्रुग्याँस  प्रहार गरेको छ ।

दाङका प्रहरी प्रमुख एसपी रामबहादुर केसीले अप्रिय घटना हुन नदिन १० राउन्ड अश्रुग्याँस प्रहार गरेको बताउनुभयो । अहिले भने स्थिति नियन्त्रणमा रहेको उहाँको भनाई छ । 

गुठी पीडित किसान संघर्ष समितिका अध्यक्ष प्रभु चौधरीले सरकारले आफूहरुसँग पटक–पटक सम्झौता गरेपनि कार्यान्वयन नगरेका कारण दबाब स्वरुप तालाबन्दी गर्नुपरेको बताउनुभयो ।