काठमाडौँ । चर्चित आरोही निर्मल पुर्जामाथि महिला आरोहीहरूले यौन दुर्व्यवहारको गम्भीर आरोप लगाएका छन् । ‘द न्युयोर्क टाइम्स’ मा प्रकाशित समाचार अनुसार हिमाल आरोहणका क्रममा उनीहरूले पुर्जाबाट दुर्व्यवहार भोगेका थिए । 

समाचार अनुसार पूर्व मिस फिनल्याण्ड लोट्टा हिन्टसा र डा अप्रिल लियोनार्डोले आफूहरूलाई यौन दुर्व्यवहार गरेको बताउनुभएको छ । पुर्जाले भने आफूमाथि लगाइएको आरोपको खण्डन गर्नुभएको छ । सन् २०१९ मा विश्वका ८ हजार मिटर माथिका १४ वटा हिमाल सफलतापूर्वक आरोहण गरेपछि पुर्जाको चर्चा चुलिएको थियो । उहाँ हाल हिमाल आरोहणसम्बन्धी कम्पनी संचालन गरेर बस्नुभएको छ । 

सन् २०१९ मा प्रकाशित आफ्नो संस्मरणमा नै हिन्टसाले आफू ‘एक चर्चित आरोही’ बाट दुर्व्यवहारमा परेको उल्लेख गर्नुभएको थियो । न्युयोर्क टाइम्ससँगको कुराकानीमा भने उहाँले पुर्जाको नाम नै उल्लेख गर्नुभएको हो ।  उहाँका अनुसार पुर्जाले आफ्नो कोठामा आएर जबरजस्ती गर्न खोजेको तर आफू नमानेपछि  पुर्जाले छेउमा बसेर हस्तमैथुन गरेको आरोप छ । 

त्यस्तै, डा. अप्रिल लियोनार्डोले पनि पुर्जाले आफूलाई जबरजस्ती समाएर चुम्बन लिएको दाबी गर्नुभएको छ । केटू हिमाल आरोहणमा पुर्जा उहाँको गाइड हुनुहुन्थ्यो । सोही समयमा यो घटना भएको उहाँको भनाई छ ।