प्रकाश बराल ‘आँशु’
कालिकोट । कालिकोटमा  जीप दुर्घटना, ७ जना घाइते भएका छन् ।घाइते सबैको अवस्था गम्भीर छ ।

सुर्खेतबाट कालिकोटको शुभकालिका गाउँपालिका आउँदै गरेको कर्णाली प्रदेश ०२–००१ च ०७९७ नम्बरको बोलेरो जीप गाउँपालिकाको वडा नम्बर ६ स्थित गाढ खोलामा दुर्घटना भएको हो । दुर्घटनामा  घाइते हुनेहरू सबै वडा नम्बर ६ हाउडीकै रहेको प्रहरीले जनाएको छ । 

प्रहरीका अनुसार दुर्घटनामा २३ वर्षीय देउके आचार्य, ३३ वर्षीय ऐन खत्री, ६० वर्षीय तीर्थ खत्री,२२ वर्षीय विष्णु शाही, १८ वर्षीया पूजा शाही,  ४० वर्षीया महिला र दैलेख चामुण्डा बिन्द्रासैनी नगरपालिका स्थायी घर भएका चालक २६ वर्षीय दीपेन्द्र चौलागाई घाइते हुनुभएको छ । 

घाइतेलाई एक विद्यालयमा राखेर प्राथमिक उपचार भइरहेको र दुर्घटनामा परेका अधिकांशको अवस्था गम्भीर भएकाले हेलिकोप्टरको पर्खाइमा रहेको वडा नम्बर ६ का पुर्व अध्यक्ष कर्ण बहादुर खत्रीले जानकारी दिनुभएको छ । 

खत्रीले घाइतेको जटिल अवस्थाबारे जिल्ला प्रशासनलाई जानकारी गराए पनि हेलिकोप्टर आउन ढिलाइ भएको बताउनुभयो ।  

प्रमुख जिल्ला अधिकारी गणेश नेपालीले घाइतेको अवस्था गम्भीर भए पनि उद्धार सजिलो नभएको बताउनुभएको छ । ‘ दुर्घटनाका घाइतेको अवस्था गम्भीर छ,  तर सुत्केरीको उद्धार जस्तो सजिलो छैन’ उहाँले भन्नुभयो – ‘हेलिकोप्टर आउने कुरा निश्चित भइसकेको छैन ।’

घाइतेको उद्धारको लागि स्थानीय तहले आर्थिक दायित्व लिने पत्र नपठाएको नेपालीको भनाई छ ।