जनकपुरधाम । पूर्वप्रधानमन्त्री माधवकुमार नेपालले देशको बदलिँदो राजनीति परिस्थितिका कारण मधेस प्रदेश  सरकारको नेतृत्व परिवर्तन हुने बताउनुभएको छ । 

नेपाल कम्युनिष्ट पार्टी (एकीकृत समाजवादी) का अध्यक्ष समेत रहनुभएका  नेपालले आज जनकपुरधाममा पत्रकारहरूसँग सङ्क्षिप्त कुरा गर्दै यस्तो बताउनुभएको हो ।  सङ्घीय सरकारको स्वरुपमा भएको परिवर्तनअनुसार मधेस प्रदेशमा पनि सरकार परिवर्तन हुने उहाँको भनाई छ । 

अध्यक्ष नेपालले मुलुक सङ्घीय संरचनामा रहेकाले केन्द्रीय संरचनाअनुसार नै प्रदेश सरकारको संरचना बाध्य भएर बनाउनुपरेको बताउनुभयो । ‘प्रधानमन्त्री पुप्पकमल दाहाल ‘प्रचण्ड’ले विश्वासको मत प्राप्त गरिसक्नुभएको छ, अब मधेस प्रदेशको सरकार पनि परिवर्तन हुन्छ’ उहाँले भन्नुभयो । 

उहाँले मुलुकको  समृद्धिका लागि वर्तमान सरकारले काम गरिरहेको दाबी समेत गर्नुभएको छ ।