काठमाडौँ । नाराबाजीको बाबजुद संसद अवरोधमा असफल भएपछि सत्ता पक्षविरुद्धको आन्दोलनबारे छलफल गर्न प्रमुख प्रतिपक्ष दल नेपाली कांग्रेसले केन्द्रीय कार्यसमिति र संसदीय दलको संयुक्त बैठक बोलाएको छ । 

कांग्रेसले जेठ ९ गतेको लागि केन्द्रीय कार्यसमिति र संसदीय दलको संयुक्त बैठक बोलाएको हो । कांग्रेसले सहकारी प्रकरणमा उपप्रधानमन्त्री तथा गृहमन्त्री रवि लामिछानेको संलग्नता रहेको आरोप लगाउँदै लामो समयदेखि प्रतिनिधिसभा र राष्ट्रियसभा बैठक अवरुद्ध पार्दै आएको छ । अवरोधको बाबजुद प्रधानमन्त्री पुष्पकमल दाहाल प्रचण्डले सोमबार प्रतिनिधिसभाबाट विश्वासको मत लिएपछि अत्तालिएको कांग्रेस आगामी आन्दोलनको रणनीति तय गर्न केन्द्रीय कार्यसमिति र संसदीय दलको संयुक्त बैठक बोलाएको हो ।

पार्टी मुख्यालय सानेपामा तय गरिएको बैठकमा समसामयिक राजनीतिक घटनाक्रमबारे छलफल तथा निर्णय हुने  कांग्रेस केन्द्रीय कार्यालयका मुख्यसचिव कृष्णप्रसाद पौडेलले जानकारी दिनुभएको छ ।