काठमाडौँ ।  व्यापार घाटा  ११ खर्ब ७७ अर्ब १८ करोड ३४ लाख रुपैयाँ नाघेको छ । चालु आर्थिक वर्षको वैशाख मसान्तसम्ममा मुलुकमा व्यापार घाटा  उल्लेखित पुगेको हो । 

भन्सार विभागले आज सार्वजनिक गरेको तथ्याङ्कअनुसार गएको वैशाखसम्ममा  १३ खर्ब  ३ अर्ब ३५ करोड ७० लाख रुपैयाँ बराबरको विभिन्न वस्तु आयात भएको छ । यस अवधिमा १ खर्ब २६ अर्ब १७ करोड ३५ लाख  रुपैयँँ बराबरको निर्यात भएको छ । 

 विभागका अनुसार चालु आवको १० महिनामा १४ खर्ब २९ अर्ब ५३ करोड पाँच लाख बराबरको वैदेशिक व्यापार भएको छ । यो अवधिको कुल वैदेशिक व्यापार गत आर्थिक वर्षको सोही अवधिको तुलनामा दुई दशमलव ५० प्रतिशतले घटेको हो । गत आर्थिक वर्षको दश महिनाको तुलनामा आयात दुई दशमलव ३९ र निर्यात ३ दशमलव ६१ प्रतिशतले घटेको छ ।

 समीक्षा अवधिमा भारतसँग नेपालले ७ खर्ब २९ अर्ब ७० करोड रुपैयाँ बराबरको व्यापार घाटा व्यहोरेको छ । भारतबाट ८ खर्ब १५ अर्ब ७२ करोडको आयात र ८६ अर्ब रुपैयाँ को निर्यात भएको छ । नेपालसँग दोस्रो ठूलो वैदेशिक व्यापार छिमेकी मुलुक चीनसँगको व्यापार घाटा २ खर्ब ३८ अर्ब ५५ करोड रुपैयाँ बराबर रहेको छ । दश महिनामा चीनसँग २ खर्ब ४० अर्ब ८३ करोड बराबरको आयात हुँदा २२ अर्ब ७४ करोड बराबरको निर्यात भएको छ ।

वैशाख मसान्तसम्मको वैदेशिक व्यापारमा सबैभन्दा धेरै आयात पेट्रोलियम पदार्थको भएको छ । यो अवधिमा एक खर्ब १५ अर्ब ६७ करोड रुपैयाँ बराबरको डिजेल  ५६ अर्ब ८० करोड बराबरको डिजेल र ४६ अर्ब रुपैयाँ बराबरको खाना पकाउने ग्यास आयात भएको छ । यही अवधिमा  २४ अर्ब एक करोड रुपैयाँ बराबरको मोबाइल फोन आयात भएको छ ।

नेपालले बढी निर्यात गरेका वस्तुमा कार्पेट ८ अर्ब ७९ करोड, अलैंची ६ अर्ब ९१ करोड, फलामजन्य वस्तु ५ अर्ब ५२ करोड र पाम आयल ५ अर्ब ६० करोड रुपैयाँ बराबर छ ।