सुर्खेत । सुर्खेतमा आज बस दुर्घटना  हुँदा २ जनाको मृत्यु भएको छ । दुर्घटनामा २१ जना घाइते भएका छन् । 

दैलेखबाट सुर्खेततर्फ आइरहेको कर्णाली प्रदेश ०२००१ ख ०८५२ नम्बरको बस वीरेन्द्रनगर नगरपालिका–७ कटकुवा नजिक दुर्घटना भएको हो ।  दुर्घटनामा दुल्लु नगरपालिका–१० गमौडी घर भई हाल ठाकुरबाबा नगरपालिका–५ नेउलापुर बस्ने  ६५ वर्षीय शेरबहादुर खड्का र दैलेख डुङ्गेश्वर गाउँपालिका–६ का भीमसेन रानाको मृत्यु भएको सुर्खेतका प्रवक्ता एवं प्रहरी नायव उपरीक्षक वीरेन्द्रवीर विश्वकर्माले जानकारी दिनुभएको छ । 

घाइतेको कर्णाली प्रदेश अस्पताल सुर्खेत र वीरेन्द्रनगरका केही मेडिकलमा उपचार भइरहेको छ । प्रहरी  प्रवक्ता विश्वकर्माका अनुसार घाइते मध्ये एक जनाको अवस्था गम्भीर छ । अरु २० जनाको अवस्था सामान्य रहेको  छ ।  

सडकबाट खसेको बस रूखमा अड्किँएको छ । बस रुखमा अड्किँदा धेरै जना बाँच्ने अवस्था बनेको प्रहरीले जनाएको छ । बस तीव्र गतिका कारण दुर्घटना भएको प्रहरीको प्रारम्भिक अनुमान छ ।