काठमाडौँ । प्रमुख प्रतिपक्षी दल नेपाली कांग्रेसको विरोध र नाराबाजीबीच प्रधानमन्त्रीले प्रतिनिधिसभामा विश्वास मतसम्बन्धी प्रस्ताव पेश गर्नुभएको छ । 

प्रतिनिधिसभाको सोमबारको बैठकमा पनि प्रमुख प्रतिपक्षी कांग्रेसले विरोध र नाराबाजी गरेको छ ।  प्रधानमन्त्री पुष्पकमल दाहाल ‘प्रचण्ड’ले कांग्रेसको अवरोधको बाबजुत विश्वासको मतसम्बन्धी प्रस्ताव पेश गर्नुभएको हो ।

आजै १५ मिनेटका लागि स्थगित बैठक पुनः शुरु भए लगत्तै कांग्रेसका सांसदहरूले आसनबाट उभिएर विरोध जनाउनुका साथै वेल घेराउ र नाराबाजी गर्नुभएको थियो । पुनः शुरू भएको बैठकमा पनि कांग्रेस सांसदको वेल घेराउ र नाराबाजी गरेका थिए । विरोधका बीच सभामुख देवराज घिमिरेले प्रधानमन्त्री दाहाललाई विश्वासको मतसम्बन्धी प्रस्ताव पेश गर्न अनुमति दिनुभएको थियो ।

कांग्रेसले सहकारीको रकम अपचलनमा उपप्रधान एवम् गृहमन्त्री रवि लामिछानेको संलग्नता देखिएको आरोप लगाउँदै निष्पक्ष र स्वतन्त्र छानविनका लागि संसदीय समिति गठनको माग गरेर संसद् बैठक अवरुद्ध गर्दै आएको छ ।