सर्लाही । सर्लाहीको लालबन्दीस्थित रानीगन्जको बीच बस्तीमा मापदण्ड विपरीत संचालनमा रहेको  ‘प्रिन्स क्रसर’लाई ईलाका प्रहरी कार्यालय लालबन्दीले संरक्षण गरिरहेको स्थानीयले आरोप लगाएका छन् । 


क्रसर संचालन सम्बन्धी सरकारले निर्धारण गरेको मापदण्डको धज्जी उडाउँदै बस्तीको बीचैमा संचालित क्रसर हटाउन यहाँका स्थानीयले पटक पटक प्रहरीमा लिखित तथा मौखिक उजुरी दिएपनि क्रसर हटाउनुको सट्टा ईलाका प्रहरी कार्यालय लालबन्दीले उल्टै संरक्षण गरिरहेको स्थानीयको आरोप छ ।

क्रसरबाट उडेको धुलोका कारण वर्षौदेखि स्थानीयले हैरानी खेप्दै आएका छन् । धुलो र धुवाँकै कारण प्रायः प्रत्येक घरमा दमका रोगी भेटिन्छन् । सिंगो बस्ती धुलोले कुइरीमण्डल छ । बालबालिका तथा दीर्घरोगीहरु अझ बढी प्रभावित  छन् । क्रसरबाट आएको चर्को होहल्ला र ध्वनी प्रदूषणका कारण दुईवटा शिक्षण संस्थाको पठन पाठन प्रभावित भएपनि यो क्रसरलाई हटाउन सरोकारवालाहरुले ठोस पहल गरेका छैनन् । 

‘प्रिन्स क्रसर’ले क्रसर संचालन सम्बन्धी कुनैपनि मापदण्ड पूरा नगरेको भेटिएपछि प्रमुख जिल्ला अधिकारी कोमल धमलाले मापदण्ड विपरीतको यो क्रसरहरुलाई अर्को आदेश नभएसम्मका लागि बन्द गराउनु भएको छ । क्रसरले वनको सयौँ बिगाह जमिन अवैधानिक रुपाम कब्जामा लिएको विषयमा डिभिजन वन कार्यालयले छानविन शुरु गरेको छ । राज्यका निकायले क्रसरको दादागिरीका विरुद्ध  ‘एक्सन’ शुरु गरेपनि अहिलेसम्म यो अवैधानिक क्रसरलाई स्थायी रुपमा बन्द वा स्थानान्तरण गराइएको छैन ।

प्रजिअको आदेशमा क्रसर बन्द भएपनि रातको समयमा लुकिछिपी क्रसर संचालन गरिरहेको स्थानीयले बताएका छन् । क्रसर संचालकको धम्कीका कारण उनीहरुले यसरी रातको समयमा क्रसर संचालन गरिरहेको सूचना कुनैपनि निकायलाई दिन सकेका छैनन् । नदी उत्खनन् गरेर वनमा गिट्टी थुपार्ने काम अहिले पनि तीब्र रुपमा भइरहेको छ ।

‘एउटा सिंगो बस्तीका ४ सय ५० घर परिवारको उठिबास लगाउने गरि अवैद्ध रुपमा संचालनमा रहेको  ‘प्रिन्स क्रसर’लाई प्रमुख जिल्ला अधिकारी र जिल्ला प्रहरी प्रमुखको सक्रियतामा तत्कालका लागि बन्द गरेपनि ईलाका प्रहरी कार्यलय लालबन्दीले यसको संरक्षण गरिरहेको छ,’ नाम उल्लेख नगर्ने शर्तमा एक स्थानीय बताउनुहुन्छ, ‘यदि प्रहरीको संरक्षण हुदैनथ्यो भने रातको समयमा कसरी क्रसर चल्छ त ?’  

मापदण्ड विपरीतको यो क्रसरलाई स्थानीयले भने जस्तै ईलाका प्रहरी कार्यालय लालबन्दीले संरक्षण गरेको भन्ने विषयमा कार्यालय प्रमुख प्रहरी निरिक्षक हरिबोल के सी पूर्णरुपमा असहमत हुनुहुन्छ । ‘हामीले कसैको संरक्षण गर्ने वा कसैलाई लखेट्ने भन्ने कुरै हुँदैन,’ प्रहरी निरीक्षण के सी भन्नुहुन्छ, -‘मापदण्ड विपरीतको अवैद्ध कामलाई संरक्षण गर्ने कुरै भएन ।’ नेपालकैरनसंग कुरागर्दै प्रहरी निरिक्षक केसीले भन्नुभयो ‘प्रजिअ'सापको आदेश पछि म आफै फिल्डमा गएर क्रसर बन्द गराएको हो, त्यसपछि क्रसर संचालन भएको मलाई जानकारी छैन । प्रहरीको बदनाम गर्न स्थानीयले प्रहरीलाई मुछेको हुनुपर्छ, यसमा कुनै सत्यता छैन ।’ उहाँले रातको समयमा छुकीछिपी क्रसर संचालन भए प्रहरीलाई खवर गर्न समेत अनुरोध गर्नुभएको छ । 

सम्बन्धित समाचार...

अवैद्ध ‘प्रिन्स क्रसर’ले कब्जा गरेको सरकारी वन खाली गराउन प्रक्रिया शुरु

नेपालकैरन निगरानी: बस्तीबीचको ‘अवैद्ध’ क्रसरले निम्त्याएको कहर

बस्तीबीचमा क्रसर उद्योग, साढे ४ सय परिवारको उठिबास