तनहुँ । तनहुँको व्यास नगरपालिकामा पुनः मतगणना गर्न उच्च अदालत पोखराले आदेश दिएको छ ।

व्यास नगरपालिकाका प्रमुखका स्वतन्त्र उम्मेदवार दीपकराज जोशीले दायर गर्नुभएको रिटमा मङ्गलबार अन्तिम सुनुवाइ गर्दै अदालतले निवेदकको दाबी पुग्ने फैसला गरेको हो  । दीपकराज पूर्वमन्त्री तथा  कांग्रेसका पूर्वसहमहामन्त्री गोविन्दराज  जोशीका छोरा हुनुहुन्छ । 

उच्च अदालतका न्यायाधीश राजनप्रसाद भट्टराई र निर्मला पौडेल भट्टराईको संयुक्त इजलासले रिट निवेदक जोशीको पक्षमा फैसला सुनाएको उच्च अदालतका सूचना अधिकारी विश्वनाथ अर्यालले जानकारी दिनुभयो । मतगणनामा धाँधली भएको भन्दै जोशीले विसं २०७९ जेठ १२ गते निर्वाचन आयोग समेत पाँचजनालाई विपक्षी बनाई रिट दर्ता गर्नुभएको थियो । जोशीका पक्षमा  पाँचजना अधिवक्ताले बहस गर्नुभएको थियो । 

स्थानीय तहको निर्वाचनअन्तर्गत व्यास नगरपालिकाको प्रमुख  नेपाली कांग्रेसका उम्मेदवार वैकुण्ठ न्यौपाने १२ हजार ७८ मत प्राप्त गरी विजयी हुनुभएको थियो । प्रतिस्पर्धी स्वतन्त्र उम्मेदवार  जोशीले ११ हजार ८ सय २६ मत प्राप्त गर्नुभएको थियो । 

न्यौपाने २०७४ को स्थानीय तह निर्वाचनमा पनि नगरप्रमुख बन्नुभएको थियो ।