प्रकाश बराल ‘आँशु’

कालिकोट । सुन्दा धेरैलाई अचम्म लाग्न सक्छ । तर सत्य यही हो, गाउँमा युवा खोजे पाइँदैनन्। बढ्दो बेरोजगारीका कारण युवापुस्ता गाउँ देखि शहर र शहरदेखि विदेश पलायन हुन थालेपछि गाउँमा कुनै मान्छेको निधन हुँदा मलामी जान समेत पुरुष भेटिन छोडेका छन् । 

गत बिहीबार जिल्लाको रास्कोट नगरपालिका–६ का धोचे दर्जिकी ६५ वर्षीया श्रीमती  नौरता दर्जीको निधन भयो । गाउँमा पुरुष नभएका कारण नौरताको अन्त्येष्टिका लागि गाउँका सबै महिला भेला भए । बैदेशिक रोजगारी तथा उच्च शिक्षाका लागि प्रायः सबै उमेर समुहका पुरुष गाउँभन्दा बाहिर छन् ।

गाउँमा पुरुषको नाममा ७० वर्ष पार गरेका वृद्ध मात्र छन् र उहाँहरु मलामी जान सक्ने अवस्थामा नहुदा महिलाहरु नै मलामी जानुपर्ने बाध्याता रहेको छ ।

गोरेटो बाटो निर्माण गर्दा होस् वा कुलो निर्माण गर्दा गाउँमा सङ्घीय संरचना आउनुभन्दा अगाडि रोजगारी पाइन्थ्यो । तर अहिले त्यस्ता भौतिक संरचना निर्माण गर्दा डोजरले काम गर्ने भएकाले काम पाउन मुस्किल हुन्छ अनि युवा पुरुष गाउँ छोड्न बाध्य छन् । 

अर्कोतर्फ पक्की संरचना निमार्ण गर्दा गाउँका युवासँग सिप नहुँदा यस्तो समस्या भएको हो । रास्कोट नगरपालिका वडा नं ६ का बसराज बमका अनुसार गाउँमा औंलामा गन्ती गर्न सकिने शिक्षक अनि विद्यालय जाने १६ वर्षमुनिका किशोरहरु मात्र छन् । 

बालवालिकाले मलामी जानु हुँदैन भन्ने संस्कार भएकाले उनिहरु मलामीमा सहभागी हुने कुरा भएन, त्यसैले पनि महिला मलामि जानुको विकल्प नभएको स्थानीयको भनाई छ । 

रास्कोट वडा नं २ का खेमराज फडेराले मलामी मात्र होइन गाउँमा कोही बिरामी हुँदासमेत महिलाले नै स्टेचर बोक्नुपरेको बताउनुभयो । यो समस्या रास्कोट मात्र नभएर प्रायः जिल्ला भरीको समस्या हो ।

शुभकालिका गाउँपालिका वडा नं ४ का रमेशकुमार सोनीले आफ्नो गाउँमा कहिलेकाहीं सामूहिक कामका लागि खबर गर्दा महिला मात्र सहभागी हुने गरेको बताउनुभयो ।