मोरङ । कोशीका नवनियुक्त मुख्यमन्त्री हिक्मतकुमार कार्कीले पद तथा गोपनीयताको शपथ लिनुभएको छ ।

आजै  बिहान संविधानको धारा १६८ को ५ अनुसार मुख्यमन्त्री नियुक्त हुनुभएका नेकपा एमाले कोशी संसदीय दलका नेता कार्कीले साँझ प्रदेश प्रमुख पर्शुराम खापुङसँग पद तथा गोपनीयताको शपथ ग्रहण गर्नुभएको हो । मुख्यमन्त्री कार्कीसँगै २ जना मन्त्रीले पनि शपथ लिनुभएको छ ।  नेकपा एमालेबाट राम राना र नेकपा माओवादी केन्द्रबाट गणेश उप्रेती बिना विभागीय मन्त्री बन्नुभएको छ । 

उहाँहरूको जिम्मेवारी भने पछि तोकिने भएको छ ।  एमाले संसदीय दलका उपनेता समेत रहनुभएका राना नेपाली कांग्रेसका केदार कार्की नेतृत्वको सरकारमा पनि मन्त्री  बन्नुभएको थियो । एमाले सरकारबाट बाहिरिएपछि उहाँले मन्त्री पद छोड्नु परेको हो । उप्रेती पनि केदार कार्की नेतृत्वको सरकारमा मन्त्री बन्नुभएको थियो ।  तर केन्द्रमा सत्ता समीकरण फेरिएपछि उहाँले पनि मन्त्री पद छोड्नु परेको हो ।