सप्तरी । सप्तकोशी नगरपालिका १ फत्तेपुरस्थित नेपाल बैंक लिमिटेडका सुरक्षा गार्डको हत्या भएको छ । नेपाल बैंकको फत्तेपुर शाखा कार्यालयका सुरक्षा गार्ड ५५ वर्षीय पर्शुराम फुँयालको हत्या भएको हो ।

सुरक्षा गार्ड फुँयालको बिहीबार बिहान ३ बजेर १८ मिनेटमा घाँटीमा खुकुरी प्रहार गरी हत्या गरिएको दृश्य सीसीटीभी फुटेजमा देखिएको सप्तरीका प्रहरी प्रवक्ता डिएसपी ढुण्डीराज न्यौपानेले जानकारी दिनुभएको छ । सुरक्षा गार्ड फुँयाल सप्तकोशी नगरपालिका २ का स्थायी बासिन्दा हुनुहुन्छ ।

डिएसपी न्यौपानेका अनुसार सीसीटिभी फुटेजमा एकजना व्यक्ति भित्र पसेर गार्डमाथि खुकुरी प्रहार गरी बैंकमा लुटपाटको प्रयास गरेको देखिएको छ । ‘त्यसपश्चात बैंकभित्र पसेर लकर, काउन्टर फुटाउने प्रयास गरेका छन् । तर लुट्न नसकेपछि फर्किएको सीसीटीभी फुटेजमा देखिन्छ’ डिएसपी न्यौपानेले भन्नुभयो । 

प्रहरीले घटनामा संलग्न आरोपमा प्रहरीले एक जनालाई पक्राउ गरेको छ ।