काठमाडौँ । उपप्रधानमन्त्री एवं स्वास्थ्य तथा जनसंख्यामन्त्री उपेन्द्र यादवले नेतृत्व गरेको जनता समाजवादी पार्टी (जसपा) नेपाल फेरि फुटेको छ । 

वरिष्ठ नेता अशोक राईको नेतृत्वमा नयाँ दल बनेको एक साता नपुग्दै राजनीतिक समिति सदस्य खगेन्द्र माखिम र प्रा डा महेन्द्र लावतीसहितको समूहले  यादवको साथ छाडेर अर्कै मोर्चा बनाएका छन् । माखिम नेतृत्वको संघीय लिम्बुवान पार्टीले २०७४ वैशाखमा जसपासँग एकता गरेको थियो । बरिष्ठ राईसहितको समूहले पार्टी फुटाएपछि यादव तनावमा रहेकै बेला माखिम समूहले पनि उहाँलार्ई ठक्कर दिएको हो । 

माखिम र लावतीसहितको समूहले बिहीबार आफूहरु जसपाबाट अलग भएको घोषण गर्दै छुट्टै राजनीतिक मोर्चा बनाएका हुन् । जसपाको राजनीतिक र केन्द्रीय समितिका सदस्यहरूले बिहीबार पत्रकार सम्मेलन गरेर प्रा डा लावतीको संयोजकत्वमा पहिचानवादी मोर्चा घोषणा गरेका हुन् । 

माखिम र लावतीसहितको समूह पछिल्लो समय पार्टीको मुख्य नेतृत्व सत्ताको खेलमा लागेको, गैरलोकतान्त्रिक आचरण अवलम्बन गरेको, पहिचानको आन्दोलनमा सक्रिय नभएको कारण आफूहरु जसपामा रहन सक्ने अवस्था नभएको बताएका छन् ।  ‘पार्टीको विभाजन आत्मघाती कदम भयो, जसपा र जसपा नेपाल दुवैमा रहिरहने अवस्था बनेन’ माखिमले भन्नुभयो । ‘दुवै जसपाका नेताहरूलाई पार्टी जिम्मा छोड्दै हामीले आफ्नो लक्ष्य र उद्देश्यका लागि अगाडि बढ्ने प्रण गर्‍यौं ।’

मोर्चाले पहिचानको मुद्दालाई सशक्त बनाउन, विभिन्न समूहमा रहेका पहिचानवादी दल, संगठन, अभियन्ता सबैलाई एकतावद्ध भई अघि बढ्न आह्वान समेत गरेको छ ।