काठमाडौँ ।  सत्तारुढ दल नेपाल कम्युनिष्ट पाटी (एकीकृत समाजवादी)ले महाधिवेशनको  तयारी तीब्र पारेको छ । 

एकीकृत समाजवादीको १० औँ महाधिवेशन असार १६ देखि २० गतेसम्म काठमाडौँ हुँदैछ ।  महाधिवेशन नजिकिँदै गर्दा कीकृत समाजवादीले मातहतका सबै निकायलाई यसको तयारीमा केन्द्रित गर्न थालेको हो । 

एकीकृत समाजवादीको महाधिवेशन मूल व्यवस्थापन कमिटीले अन्य कमिटीलाई जिम्मेवारी प्रदान गरेको छ । मातहतका सबै कमिटीलाई सदस्यता अभिलेख, कार्य प्रगतिको विवरण केन्द्रमा बुझाउन निर्देशन समेत दिएको छ । सबै कमिटी, विभाग र फाँटलाई आगामी असार ५ गतेभित्र महाधिवेशन प्रतिनिधिको फोटोसहितको विवरण पार्टी केन्द्रीय कार्यालयमा पठाउन भनिएको छ ।

पार्टीले मातहतका सबै निकाय, क्षेत्र तथा तहबाट महाधिवेशन प्रतिनिधि छनोट गरी निर्धारित शुल्कसहित प्रतिनिधि छनोटको नामावली समयमा केन्द्रमा बुझाउनुपर्ने छ । पार्टीअन्तर्गत रहेका सबै कमिटीले असार १ गते प्रतिनिधि छनोट गर्ने कार्यतालिका रहेको पार्टी प्रवक्ता जगन्नाथ खडिवडाले जानकारी दिनुभएको छ ।

केन्द्रीय सङ्गठन विभागले नेता तथा कार्यकर्ताको सदस्यता प्रदान र नवीकरणको सबै प्रक्रियाका साथै शुल्कसहितको विवरण केन्द्रले प्रमाणीकरण गर्ने छ । सदस्यता प्रमाणित गरेपछि त्यसको नामावली विवरण  वैशाख ३० गतेसम्ममा सम्बन्धित कमिटीमा पठाइने छ ।

महाधिवेशनको तयारीबारे छलफल तथा निर्णय गर्न  एकीकृत समाजवादी वैशाख २८ र २९ गते केन्द्रीय कमिटीको बैठक बोलाएको छ। त्यसले प्रतिनिधिको नामवलीलगायत अन्य आवश्यक कार्यसूची अनुमोदन गर्ने छ ।

प्रवक्ता खतिवडाका अनुसार जेठ ९ गतेसम्ममा सबै कमिटीमा महाधिवेशनका लागि प्रस्तुत गरिने मस्यौदा दस्तावेज पठाइने छ । सबै कमिटीले मस्यौदा दस्तावेजमाथि आफ्नो कार्यक्षेत्रमा रहेका पार्टी सङ्गठित सदस्यहरुलाई जेठ ३२ गतेसम्म छलफल गराउने तालिका छ ।