काठमाडौँ । सरकारले कर नतिर्ने चार सहकारी संस्थालाई बक्यौता कर चुक्ता गर्न ताकेता गरेको छ । मध्यमस्तरीय करदाता कार्यालयले मंगलबार सूचना प्रकाशित गर्दै आयकर र मूल्य अभिवृद्धि कर (भ्याट) दाखिला नगरेका विभिन्न चार सहकारी संस्थालाई कर तिर्न ताकेता गरेको हो । 

यसरी कर नतिर्ने सहकारीहरुमा कान्तिपुर सेभिङ एन्ड क्रेडिट कोअपरेटिभ लिमिटेड, श्री लालीगुराँस बहुउद्देश्यीय सहकारी संस्था , शिखरदीप बहुउद्देश्यीय सहकारी संस्था तथा क्यापिटल सेभिङ एन्ड क्रेडिट कोअपरेटीभ लिमिटेड रहेको करदाता कार्यालयले सूचनामा उल्लेख गरेको छ । 

सूचना प्रकाशन भएको मितिले १५ दिनभित्र बक्यौता फरफारक नभए आयकर बक्यौताका हकमा आयकर ऐन, २०५८ को दफा १०४ देखि दफा १११ सम्म तथा भ्याट बक्यौताका हकमा मूल्य अभिवृद्धि कर ऐन, २०५२ को दफा २१ मा उल्लेखित प्रक्रिया अपनाइ कानुनी कारबाहिबाट असुल गरिने कार्यालयले जनाइएको छ ।

कर बक्यौता रकम दाखिला गर्न विभिन्न मितिमा फोन सम्पर्क, एसएमएस, ईमेल तथा पत्राचार गरी जानकारी गराइएको कार्यालयले जनाएको छ ।