काठमाडौँ । मधेश प्रदेशसभामा जनमत पार्टीको नाराबाजीपछि  बैठक स्थगित भएको छ । 

प्रदेशसभामा आज मुख्यमन्त्री सरोजकुमार यादव विश्वासको मत लिने कार्यसूची छ । सभामुखले बैठक शुरु गरेलगत्तै जनमत पार्टीका सांसद चन्दन सिंहले प्रदेश सरकारले गरेको प्रतिवद्धता पूरा गर्नुपर्ने माग राख्दै नाराबाजी शुरु भएको हो । 

गएको माघ ८ गते कृषि विश्वविद्यालयको उद्घाटनमा जनमत पार्टीका सांसद महेशप्रसाद यादवमाथि आक्रमण भएको थियो । मुख्यमन्त्रीले तेस्रो पटक विश्वासको मत लिँदा फागुन ६ गते त्यो घटनाको बारे छानविनको  समिति गठन गर्ने प्रतिवद्धता जानउनुभएको थियो । त्यसपछि प्रदेश सरकारले घटना छानविन गर्ने निर्णय समेत गरेको थियो ।

जनमत पार्टीका सांसदहरुले त्यस विषय उठाएर प्रदेशसभा बैठक अवरोध गरेका हुन्  ।  जनमत पार्टीका सांसदहरुले मुख्यमन्त्रीले  आज चौथो पटक  विश्वासको मत लिँदा समेत त्यो माग पूरा नभएको भन्दै बैठक अवरोध गरे । त्यसपछि सभामुखले १० मिनेटका लागि बैठक स्थगित भएको जानकारी गराउनुभयो ।