दाङ ।  माटोको ढिस्कोले पुरिएर दुई बालकको मृत्यु भएको छ । 

घोराही उपमहानगरपालिका–९ आन्द्राभरैयाका १२ वर्षीय आषिश चौधरी र त्यही ठाउँकै १२ वर्षीय माधव चौधरी  ढिस्कोमा पुरिएको जिल्ला प्रहरी प्रमुख प्रहरी रामबहादुर केसीले जानकारी दिनुभएको छ ।

आन्द्राभरैयाका चार बालक घरदेखि करिब पाँच सय मिटर टाढा रहेको कर्मटे भन्ने स्थानमा बबई नदीको किनारमा खेल्न गएका बेलामा उनीहरु माटोको ढिस्कोमा पुरिएको प्रहरीको भनाइ छ । आज दिउँसो खेल्न गएकामध्येबाट तीन खाल्डोमा परेपछि एकजना बालकको उद्धार गरिए पनि अन्य दुईजना गहिरो खाल्डोमा गएर पुरिएका थिए । 

पुरिएकालाई गाउँलेले उद्धार गरी राप्ती स्वास्थ्य विज्ञान घोराहीमा उपचारका लागि लगिएकामा अस्पतालले मृत घोषणा गरेको प्रहरी प्रमुख केसीले जानकारी दिनुभयो । खाल्डो किन खनिएको थियो ? भन्ने बारेमा अनुसन्धान भइरहेको प्रहरीले जनाएको छ ।