पोखरा । अन्नपूर्ण गाउँपालिका–४ भदौरेमा आइतबार दिउँसो भएको जीप दुर्घटनामा २ जनाको मृत्यु भएको छ । दुर्घटनामा १० जना घाइते भएका छन् ।  

दुर्घटनामा घाइते भएका पोखरा महानगरपालिका–२३ का ५५ वर्षीय लक्ष्मण सुनार र   त्यही ठाउँका ५२ वर्षीय जयराम सुनारको मणिपाल शिक्षण अस्पतालमा उपचारका क्रममा निधन भएको जिल्ला प्रहरी निमित्त प्रवक्ता सूर्य रानाले जानकारी दिनुभएको छ । प्रहरी निमित्त प्रवक्ता रानाका अनुसार घाइते मध्ये .५ जनाको मणिपालमा र ५ जनाको पोखरा स्वास्थ्य विज्ञान प्रतिष्ठानअन्तर्गत पश्चिमाञ्चल क्षेत्रीय अस्पतालमा उपचार भइरहेको छ ।

पोखराबाट अन्नपूर्णको भदौरेतर्फ जाँदै गरेको ग १ ज ५५४७ नम्बरको यात्रुवाहक जीप दिउँसो सल्लाघारी भन्ने ठाउँमा घुम्तीबाट दुई सय मिटर तल खसेको हो । नेपाल प्रहरी, सशस्त्र प्रहरी तथा स्थानीयवासीको सहयोगमा घटनास्थलबाट घाइतेको उद्धार गरिएको थियो । घटनास्थल पोखराबाट २९ किमी टाढा पर्छ ।