काठमाडौँ । मुलुकमा राजतन्त्र पुनस्थापना गर्ने उदेश्यले आन्दोलन थालेको राष्ट्रिय प्रजातन्त्र पार्टी (राप्रपा)ले अब निषेधित क्षेत्रमै प्रदर्शन गर्ने भएको छ ।  राप्रपाका अध्यक्ष राजेन्द्र लिङ्देनले वैशाख ७ गते पार्टीले निषेधित क्षेत्रमै प्रदर्शन गर्ने बताउनुभएको छ । 

राप्रपा केन्द्रीय कार्य सम्पादन समितिको बिहीबारको बैठकपछि अध्यक्ष लिङ्देनले यस्तो बताउनुभएको हो । ‘सरकारले नागरिक अधिकारलाई संकुचित बनाउँदै लगेको छ, त्यसको विरुद्ध हामी निषेधित क्षेत्रमै गएर प्रदर्शन गर्ने निर्णय गरेका छौँ’ बैठकपछि उहाँले सञ्चारकर्मीसँग भन्नुभयो । 

अध्यक्ष लिङ्देनले ७ गतेको कार्यक्रम सभाभन्दा प्रदर्शनको रूपमा अगाडि बढ्ने जानकारी गराउनुभएको छ । पार्टीको विशेष समितिको बैठक बसेर थप कार्यक्रमसार्वजनिक गर्ने उहाँको भनाई छ । 

राप्रपाले वैशाख २० गतेभित्र आफ्ना नेताहरू निःशर्त रिहा नगरे आन्दोलन सशक्त रुपमा चर्काउने चेतावनी समेत दिएको छ ।