काठमाडौँ । सर्वोच्च अदालतले सहकारी गठी प्रकरणमा पूर्वडीआईजी छविलाल जोशीलाई थुनामा पठाउनुको कारण मागेको छ । सर्वोच्चले जोशीलाई थुनामा पठाउनुको कारण पेश गर्न उच्च अदालत तुलसीपुरको बुटबल इजलासको नाममा आदेश जारी गरेको हो ।

सर्वोच्चका न्यायाधीश विनोद शर्माको इजलासले छविलाई मुद्दाको पुर्पक्षका लागि थुनामा पठाउने आदेशको कैफियत प्रतिवेदन मगाउन आदेश दिएको छ । बुटबलको सुप्रिम सहकारी ठगी प्रकरणका आरोपित एवं पूर्वडीआईजी जोशीले उच्च अदालतको आदेश बदर हुनुपर्ने माग राखी सर्वोच्च अदालतमा निवेदन दिएका थिए । त्यही निवेदनमाथिको सुनुवाइपछि सर्वोच्चले प्रतिवेदन मगाउन आदेश जारी गरेको हो ।

उच्च अदालत तुलसीपुरको बुटबल इजलासले गत साता रवि लामिछाने र छविलाल जोशीलाई थुनामा पठाउन आदेश दिएको थियो । जोशी सुप्रिम सहकारी ठगी प्रकरणमा पक्राउ परेदेखि थुनामै छन् ।