काठमाडौँ । हनुमान जयन्तीको शोभायात्रा निकाल्ने क्रममा पर्साको वीरगञ्जमा हिन्दू र मुस्लिम समुदायबीच झडप भएको छ । वीरगञ्जको छप्कैया चोकमा दुई समुदायबीच झडप भएको हो ।

झडपका क्रममा केही पसलहरूमा आगजनी समेत गरिएको छ । झडपमा केही स्थानीय र प्रहरी समेत घाइते भएका छन् । झडप नियनन्त्रण गर्न प्रहरीले केही शेल अश्रुग्याँस समेत प्रहार गरेको छ । अहिले त्यहाँको अवस्था तनावग्रस्त बनेको छ ।

यसैबीच, वीरगञ्जको अवस्था तनावग्रस्त बनेपछि जिल्ला प्रशासन कार्यालयले कर्फ्यु लगाउने तयारी गरेको छ । 

दुई पक्षबीचको झडपले अवस्था तनावग्रस्त बनेपछि जिल्ला प्रशासन कार्यालय पर्साले कर्फ्यु लगाउने तयारी गरेको प्रमुख जिल्ला अधिकारी गणेश अर्यालले बताउनुभयो । कुन कुन ठाउँमा कर्फ्यु लगाउने भन्नेबारेमा अहिले जिल्ला प्रशासन कार्यालयमा छलफल चलिरहेको अर्यालको भनाई छ ।