चितवन ।  चितवन जिल्ला अदालतले पूर्वगृहमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछानेलाई प्रहरीको जिम्मा लगाएको छ ।

जिल्ला अदालतमा आज थुनछेक बहस नसकिएपछि पूर्वगृहमन्त्री लामिछानेलाई फेरि न्यायिक हिरासत पठाइएको हो ।  जिल्ला न्यायाधीश दयाराम ढकालको इजलासले लामिछानेलाई न्यायिक हिरासतमा राख्न आदेश दिएको हो । 

न्यायाधीश ढकालको इजलासले लामिछानेलाई भोलि (बिहीबार) १० बजे अदालतमा उपस्थित हुनेगरी न्यायिक हिरासतमा पठाउने आदेश दिएको छ ।  साहारा चितवन बहुउद्देश्यीय सहकारी संस्था लिमिटेडको रकम हिनामिना प्रकरणमा लामिछानेसहित १५ जना प्रतिवादीको आजदेखि बयान र थुनछेक बहस शुरु भएको छ । 

बुधबार सरकारी वकिलको तर्फबाट जिल्ला न्यायाधिवक्ता रवि न्यौपाने र सहकाय न्यायाधिवक्ताहरू अमृत सुवेदी, बुद्ध बहादुर थापासहित ३ जनाले बहस गर्नु भएको थियो । सरकारी वकिलको बसह सकिएको छ । सहकारी पीडितको तर्फबाट रमेश काफ्लेको मात्रै बहस सकिएको छ । अन्य बहस भोलि अदालत खुलेपछि हुने भएको छ । 

अन्य बहस नसकएको कारण अदालतले लामिछानेलाई न्यायिक हिरासतमा राख्न आदेश गरेको हो । जाहेरवाला र प्रतिवालीको तर्फबाट बहस र थुनछेक गर्नका लागि भोलि उपस्थित हुनेगरी लामिछाने प्रहरीको जिम्मा लगाइएको छ ।