काठमाडौँ । कर्णाली प्रदेशलाई ७ विकेटले पराजित गर्दै बागमती प्रदेश प्रधानमन्त्री कप राष्ट्रिय क्रिकेट प्रतियोगिताको शीर्षस्थानमा उक्लिएको छ ।

कर्णालीले प्रस्तुत गरेको ७९ रनको समान्य लक्ष्य बागमतीले १३ ओभरमा तीन विकेट गुमाउँदै लक्ष्य पुरा गर्यो । बागमतीका लागि इशान पाण्डेले सर्वाधिक ४० रन जोडे । त्यस्तै रविन जोशीले अविजित १६ रन बनाए । आशुतोष घिरैयालाई ९ रन जोड्दा रित गौतमले आठ बनाए । कर्णालीका लागि ३ विकेट दिवान पुनले लिए ।
 
यस जितसँग बागमतीले छ खेलमा ४ मा जित तथा २ हारसहित ८ अङ्क जोडेको छ । बागमतीले यसअघि मधेस प्रदेश, त्रिभुवन आर्मी क्लब र कोशी प्रदेशलाई हराएको थियो ।  नेपाल पुलिस क्लब र एपिएफसँग भने बागमती पराजित भएको थियो । त्यसअघि टस जितेर ब्याटिङ रोजेको कर्णालीले २४ दशमलव दुई ओभरमा सबै विकेट गुमाउँदै ७८ रनमा समेटिएको थियो । कर्णालीका लागि अर्जुन घर्तीले २३ र निश्चल रावलले १३ रन बनाउनु बाहेक अन्य खेलाडीले दोहोरो अङ्कमा रन जोड्न सकेनन् ।

बागमतीका लागि रिजन ढकालले ५ विकेट लिए ।  इशान पाण्डेले २ तथा प्रतिश जिसी, सूर्य तामाङ र विपिन आचार्यले समान १, १ विकेट लिए । यस हारसँगै कर्णाली ५ खेलमा २ जित र ३ हारसहित ४ अङ्क जोड्दै अङ्क ताकिलाको सातौँमा छ ।