मकवानपुर ।  राष्ट्रियसभा सदस्य निर्वाचनका लागि प्रदेश निर्वाचन कार्यलय बागमती प्रदेशले आज मतदाताको अन्तिम नामावली सार्वजनिक गरेको छ । आयोगले सार्वजनिक गरेको अन्तिम नामावली अनुसार बागमती प्रदेशबाट ३ सय ४७ मतदाताले मतदान गर्नेछन् ।  

प्रदेश निर्वाचन कार्यालयका अनुसार बागमती प्रदेश (क्लस्टर) मा चार पदको निर्वाचन हुँदैछ । चार पदका लागि सोमबार (भोलि) बिहान १० बजेदेखि अपराह्न ३ बजेसम्म उम्मेदवारी दर्ता गर्ने समय निर्धारण गरिएको छ । 

निर्वाचनमा बागमती प्रदेशसभाका १ सय १० जना प्रदेशसभा सदस्य र स्थानीय तहका प्रमुख र उपप्रमुख २ सय ३७ जना गरी कुल ३ सय ४७ मतदाता रहेको बागमती प्रदेश निर्वाचन कार्यालयका सहायक निर्वाचन अधिकृत तारा आचार्यले जानकारी दिनुभयो ।

कुनै पनि मतदाता विरुद्ध उजुरी नपरेकाले नामावलीमाथि थप संशोधन गर्न नपरेको  बागमती प्रदेश निर्वाचन अधिकृत सञ्जेलले बताउनुभयो ।