लमजुङ । लमजुङमा सञ्चालित एकमात्र गुरुकुल आश्रमका आवासीय विद्यार्थीको भरणपोषणका लागि १५ रोपनी खेतमा स्थानीय अभिभावकले श्रमदानबाट  रोपाइँ गरेका छन् ।

दुराडाँडास्थित पाणिनी संस्कृत माध्यामिक विद्यालयमा सञ्चालित गुरुकुल आश्रम व्यवस्थापन समितिको संयुक्त पहलमा श्रमदानबाट रोपाइँ गरिएको विद्यालय व्यस्थापन समितिका अध्यक्ष अमृत न्यौपानेले बताउनुभयो । 

गुरुकुलमा जुम्ला, कालिकोट र मुगुका  विपन्न ब्राह्मण परिवारबाट  ल्याइएका ७ देखि १३ वर्षका  २७ जना वटुक  आश्रममा अध्ययन गरिरहेका छन् । आश्रमका वटुकको भोजनका निम्ति भिक्षा माग्न गाउँघर डुल्नुभन्दा विद्यालयको खेत र त्यस नजिकको बाँझो भूमिमा करिब एक लाख बराबरको श्रमदान गरेर रोपाइँ सम्पन्न भएको गुरुकुलका  अध्यक्ष पुष्पराज अधिकारीले बताउनुभयो । खेतबाट उत्पादन हुने धानले वटुकलाई छ महिना भोजनको व्यवस्था गर्न सहज हुने विश्वास उहाँले व्यक्त गर्नुभयो । 

सुन्दरबजार नगरपालिकाले रोपाइँ गर्न आश्रमलाई ५ लाख  रुपैयाँ प्रदान गरेको थियो । त्यो रकम मध्ये ३० हजार रुपैयाँ मलखाद र बीउ खरिदमा खर्च भएको जानकारी उहाँले दिनुभएको  छ।