झापा ।  झापामा ८ सय २७ हेक्टर सिँचाइ सुविधा बिस्तार भएको छ । आर्थिक वर्ष २०८०/८१ मा १ सय ३० हेक्टरमा सुविधा बिस्तार तथा ६ सय ९७ हेक्टरमा सिँचाइ सेवा पुनःस्थापना गरिएको हो ।

जलस्रोत तथा सिँचाइ विकास डिभिजन कार्यालयका प्रमुख शैलेश पोखरेलका अनुसार साना–ठूला गरी एक सय ३२ आयोजना सम्पन्न भएसँगै सिँचाइ सुविधा बिस्तार  भएको हो । ‘गत आवमा कार्यालयको पुँजीगतर्फ विनियोजित रकम  ३१ करोड ८९ लाख ४८ हजार रुपैयाँमध्ये २९ करोड ८ लाख ३८ हजार ४ सय ७४ रुपैयाँ खर्च भएको छ । 

चालुतर्फ पनि विनियोजित बजेटको ९२ दशमलव ७ प्रतिशत खर्च भयो । गत वर्ष कोशी प्रदेश सरकार सञ्चालनमा विवाद हुँदा बजेट ढिलागरी प्राप्त भएकाले आयोजना सञ्चालनमा ढिलाइ भएको प्रमुख पोखरेलले बताउनुभयो ।

यसैगरी  कार्यालयले नदी व्यवस्थापनतर्फ  ५ हजार १ सय ९ मिटर सम्पन्न गरी १ हजार ६ सय ८४ हेक्टर जमिन संरक्षण र ६० हेक्टर जमिन उकास गरेको छ । यी योजना सम्पन्न भएसँगै २ हजार ६ सय ४ परिवार लाभान्वित भएका डिभिजन प्रमुख पोखरेलले बताउनुभयो । 

बहुवर्षीय योजना मेचीनगर–८ मा सञ्चालित निन्दाखोला सिँचाइ योजना, मेचीनगर–७ मा पालिया पूर्व सिँचाइ योजना र गौरीगञ्जमा सञ्चलित तल्लो किस्ने सिँचाइ योजना अन्तिम चरणमा रहेका कार्यालयले जनाएको छ । यी योजना सम्पन्न भएसँगै २ हजार १ सय ५ हेक्टर क्षेत्रफलमा सिँचाइ सुविधा पुग्नेछ ।