काठमाडौँ ।  मनसुनी वर्षाका कारण आएको बाढीपहिरा लगायत विपदमा परेर गत जेठ २८ गते यता १ सय ३३ जनाको मृत्यु भएको छ । 

प्रहरी प्रधान कार्यालयका अनुसार यस अवधिमा १ सय ४५ जना घाइते भएका छन् भने सिमलताल घटना बाहेक ७ जना बेपत्ता रहेका छन् । 

प्रहरी प्रवक्ता, प्रहरी नायव महानिरीक्षक दानबहादुर कार्कीले काठमाडौँ उपत्यकामा दुई, कोशी प्रदेशमा २२, मधेस प्रदेशमा छ, बागमती प्रदेशमा २५, गण्डकी प्रदेशमा ३८, लुम्बिनी प्रदेशमा २३, कर्णाली प्रदेशमा सात र सुदूरपश्चिम प्रदेशमा १० जनाको मृत्यु भएको बताउनुभयो । 

उहाँका अनुसार काठमाडौँ उपत्यकामा नौ, कोशी प्रदेशमा ३४, मधेस प्रदेशमा नौ, बागमती प्रदेशमा सात, गण्डकी प्रदेशमा २९, लुम्बिनी प्रदेशमा नौ, कर्णाली प्रदेशमा ३४ र सुदूरपश्चिम प्रदेशमा १४ गरी एक सय ४५ जना घाइते भएका छन् । 

काठमाडौँ उपत्यकामा एक, कोशी प्रदेशमा ४९, गण्डकी प्रदेशमा १२ र सुदूरपश्चिम प्रदेशमा पाँच गरी ६७ जनाको उद्धार गरिएको छ । बाढीपहिरामा परी सात जना बेपत्ता रहेको जनाइएको छ । यस अवधिमा विपद्का घटनाबाट चार हजार १८ परिवार विस्थापित भएका छन् ।