काठमाडौँ । नेकपा एमालेका अध्यक्ष केपी शर्मा ओली नेतृत्वको सरकारमा पुरुष महिलामन्त्री बनेका छन् । राज्यको हरेक क्षेत्रमा ३३ महिला हुनुपर्ने प्रावधान भए पनि प्रधानमन्त्री ओलीले त्यसलाई लत्याएर पुरुषलाई महिलामन्त्री बनाउनुभएको  छ । 

एमाले र नेपाली कांग्रेसहितको गठबन्धन सरकारमा जनता समाजवादी पार्टी (जसपा) का नवलकिशोर साह सुडीलाई महिला, बालबालिका तथा ज्येष्ठ नागरिकमन्त्री बनाइएको छ । नवनियुक्त महिलामन्त्री सुडीले मंगलबार पदभार समाल्नुभएको छ । सुडी यसअघिको पुष्पकमल दाहाल प्रचण्ड नेतृत्व सरकारमा वन तथा वातावरणमन्त्री हुनुहुन्थ्यो ।  जसपा पुरानो गठबन्धनलाई छाडेर सत्ताको नयाँ समीकरणतिर लागेपछि भागबण्डामा उहाँलाई महिलामन्त्री परेको हो । ओली सरकारमा २ जना महिलालाई मात्र मन्त्री बनाइएको छ । एमालेकी विद्या भट्टराईले शिक्षा मन्त्रालयको जिम्मेवारी समाल्नुभएको छ । कांग्रेसकी डा आरजू देउवालाई परराष्ट्रमन्त्री बनाइएको छ  । २५ सदस्यीय मन्त्रीमण्डलमा २ जना मात्रै महिलालाई मन्त्री बनाउनु समावेशी हिसाबले अपुग हो । 

मन्त्रालयको जिम्मेवारी सम्हालेसँगै सुडीले महिला, बालाबालिका तथा ज्येष्ठ नागरिकको विकासका लागि पूर्ण निष्ठाका साथ  काम गर्ने प्रतिबद्धता व्यक्त गर्नुभयो ।  उपलब्ध स्रोत–साधनको अधिकतम उपयोग गरेर बढीभन्दा बढी परिणाममुखी कार्य गर्न कर्मचारीहरूलाई निर्देशन दिँदै उहाँले देश र जनतालाई केन्द्रमा राखेर काम गर्नुपर्नेमा जोड दिनुभयो । उहाँले भन्नुभयो– ‘कर्मचारीको साथ र सहयोगबिना मन्त्रीको एक्लो प्रयासबाट लक्ष्य हासिल हुँदैन ।’ 

उहाँ २०७९ सालमा सप्तरी क्षेत्र १ बाट प्रतिनिधिसभा सदस्य निर्वाचित हुनुभएको हो ।  सप्तरीको हनुमाननगर कङ्कालीनी–९ मा आमा कौशल्या देवी र बुबा भोलाप्रसाद साहुको कोखबाट २००५ सालमा सुडीको जन्म भएको हो ।