काठमाडौँ। गुरुङ समुदायको ‘तमु ल्होसार आइतबार देशभर हर्षोल्लासका साथ मनाइएको छ ।  

उपत्यकाका गुरुङ समुदायले काठमाडौंको टुँडिखेलमा भव्य रुपमा  ‘तमु ल्होसार’ मनाए । ल्होसार मनाउन गुरुङ समुदाय महिला, पुरुष तथा युवा युवती तथाहरु आफ्नो भेषभुषा र झाँकीसहित टुँडिखेल जुटेका थिए । उनीहरुले त्यहाँ दिनभर नाचगान गर्दै  ‘तमु ल्होसार’ मनाए । ‘तमु ल्होसारको उपलक्ष्यमा आयोजित विशेष कार्यक्रम प्रधानमन्त्री, मन्त्री तथा सांसदहरुको समेत सहभागिता रह्यो । ‘तमु ल्होसार’ कार्यक्रममा अन्य समुदायले पनि सहभागी भएर खुशीयाली मनाए । 

पुरानो वर्षलाई बिदाइ गरी नयाँ वर्षलाई स्वागत गर्न तमु ल्होसार मनाउने चलन छ । गुरुङ समुदायको परम्परागत पात्रोअनुसार पुस १५ गते अर्थात् ल्होसार नयाँ वर्षको दिन हो । ‘ल्हो’ को अर्थ वर्ष र ‘सार’ को अर्थ फेरिनुभएकाले वर्ष फेरिने दिनलाई ‘तमु ल्होसार’ भनिएको हो । तमु ल्होसारलाई गुरुङ समुदायले नयाँ वर्षका रुपमा भव्यरुपमा मनाउँछन् ।

यस दिनमा आफन्त, कुलकुटुम्बसँग भेटघाटका साथै भोजभतेर खुवाउने तथा शुभकामना आदान प्रदान गर्ने चलन छ । ‘तमु ल्होसार’ पर्व सूर्यको किरणसँग सम्बन्धित छ । गुरुङ बाहुल्य रहेको लमजुङ, गोरखा, तनहुँ, स्याङ्जा, मनाङ, कास्की, पर्वतलगायत जिल्लामा सूर्यको ताप पहिले आउने भएकाले पुस १५ मा यो पर्व मनाउने गरिएको हो ।

यसपछि क्रमशः तामाङ र शेर्पा जातिको बसोबास भएको क्षेत्रमा सूर्यको ताप आउने भएकाले माघ र फागुनमा यो पर्व मनाइने विश्वास गरिन्छ ।