सुनसरी । जिल्लामा यस वर्ष आँप उत्पादनमा कमी आउँदा  मूल्य बढेको छ  । 

हुरीबतास र कीराले क्षति पुर्याएको कारण गत वर्षका तुलनामा यस वर्ष आँपको उत्पादनमा कमी आएको जिल्ला कृषि ज्ञान केन्द्रका सूचना अधिकृत प्रविनलाल श्रेष्ठले जानकारी दिनुभएको छ । 

उहाँले भन्नुभयो– कीराको जोखिम र हुरीबतासका कारण गत वर्षभन्दा यस वर्ष उत्पादन कम भएको हो । उत्पादन कम भएसँगै मूल्यवृद्धि भएको छ । खुद्रा प्रतिकिलो ५५ सम्ममा बिक्री हुने आँप अहिले प्रतिकिलो ८० देखि १ रुपैयाँ सम्ममा बिक्री हुने गरेको छ ।’ गत वर्ष प्रतिकिलो  ५० भन्दा कममै आँप बिक्री भएको उहाँले बताउनुभयो ।
 
केन्द्रका अनुसार जिल्लामा यस वर्ष  १ हजार १ सय २४ हेक्टर क्षेत्रफलमा १ हजार १सय ८६ मेट्रिक टन आँप उत्पादन भएको छ । गत वर्ष १ हजार १ सय २४ हेक्टरमा ७ हजार ५ सय ६५ मेट्रिक टन उत्पादन भएको थियो ।

जिल्लाको इनरुवा, नसिङ, हरिनगरा, बक्लौरी, गौतमपुर, प्रकाशपुर, भोक्राहा लगायत ठाउँ आँप ‘पकेट’ क्षेत्र हुन् । अहिले बजारमा माल्दा, आम्रपाली, कलकत्तिया, बम्बई, कृष्णभोग लगायत आँप बिक्री हुने गरेको छ । 

जिल्लामा व्यावसायिक रूपमा किसानले आँपखेती नगरे पनि पछिल्लो समय आँप उत्पादन घट्दै गएको सूचना अधिकृत श्रेष्ठले बताउनुभयो ।  आँपको एक वर्ष राम्रो फल लाग्ने र अर्को वर्ष फल कम लाग्ने भएकाले पनि उत्पादनमा कमी आएको जनाइएको छ ।