काठमाडौँ । नेकपा एकीकृत समाजवादीको नेतृत्व पुन पूर्वधानमन्त्री माधवकुमार नेपालले नै गर्ने निश्चित भएको छ । 
  
एकीकृत समाजवादीको गएको आइतबारदेखि शुरु भएको १० औँ महाधिवेशन आजदेखि केन्द्रीय पदाधिकारी र केन्द्रीय सदस्य चयनको संघारमा पुगेको छ । समाजवादीको २१ पदाधिकारी मध्ये अध्यक्षमा पूर्वप्रधानमन्त्री नेपाल सम्मानित नेतामा अर्का पूर्वप्रधानमन्त्री झलनाथ खनाल र महासचिवमा घनश्याम भूसाल नै दोहोरिने निश्चित भएको छ  ।  

केही दिनअघिसम्म अध्यक्षमा दाबी गरिरहनुभएका भूसाल अन्तत महासचिवमै दोहोरिन उत्साहपूर्वक राजी हुनुभएको छ । महाधिवेशनमा सहभागी करिब दुई तिहाई जसो प्रतिनिधि, यसअघि पदाधिकारीमा रहेका नेताहरु र प्रतिनिधिसभा सदस्यहरुले ‘अहिले राजनीति जटिल अवस्थमा रहेको र यस्तो परिस्थितिमा अध्यक्षमा पूर्वप्रधानमन्त्री नेपालको विकल्प नभएको’ भन्दै नेतृत्वलाई सर्वसम्मत गर्न दबाब दिएपछि तीन पदमा सहमति हुने स्थिति बनेको हो ।  

महाधिवेशनमा सहभागी एक पूर्व पदाधिकारीले अध्यक्ष, सम्मानित नेता र महासचिवमा अहिले भइरहेका नेताहरुलाई नै दोहोर्याउने सहमति बनिसकेको नेपाल कैरनलाई जानकारी दिनुभएको छ । ‘यी  ३ पदमा सहमति भइसकेको छ, तर पूर्वधानमन्त्री खनालले सम्मानित नेता र महासचिवलाई विगतमा भन्दा केही अधिकार दिनुपर्ने भनेपछि  शीर्ष नेताहरुबीच अहिले त्यसबारे छलफल भइरहेको छ’ उहाँले भन्नुभयो– अधिकारको कुरा मिलेपछि सम्भवत अब केही समयपछि अध्यक्ष, सम्मानित नेता र महासचिव सर्वसम्मत भएको घोषणा हुनेछ । यी ३ पद बाहेक अरु पदाधिकारी र २ सय ९९ सदस्यीय केन्द्रीय सदस्यको लागि भने निर्वाचन हुने स्थिति देखिएको छ । 

महाधिवेशन प्रतिनिधिद्वारा राजनीतिक, समाजवादी कार्यक्रम, विधान र साङ्गठनिक दस्तावेजलाई सुझावसहित अनुमोदन भइसकेको छ ।  महाधिवेशनले नयाँ कार्यसमिति निर्वाचित गर्ने जिम्मेवारी निर्वाचन मण्डललाई दिएको छ । निर्वाचनमण्डलले निर्वाचन प्रक्रियाअन्तर्गत मतदाता नामावली प्रकाशनको तयारी गरेको छ ।

मनोनयन दर्ता गर्ने, दाबी विरोध तथा उम्मेदवारी फिर्ता लिने समय, मतदानको कार्यसूची आजैको लागि तोकिएको छ । पार्टी केन्द्रीय कमिटी, अनुशासन र लेखापरीक्षण कमिटीले संयुक्त रुपमा निर्वाचन निर्देशिका निर्माण गरेको छ ।

प्रत्येक जिल्लाबाट कम्तीमा एक जना सदस्य केन्द्रीय कमिटीमा प्रतिनिधित्व रहने सुनिश्चितता कायम गरिएको छ । सबै निर्वाचन क्षेत्रबाट केन्द्रीय कमिटीको निर्वाचन गर्दा २० प्रतिशत २५–४५ वर्ष उमेर समूहको आरक्षण गर्नुपर्ने निर्देशिकामा उल्लेख छ ।

निर्वाचन विद्युतीय उपकरणबाट गरिने जनाइएको छ । एक हजार आठ सय ४९ प्रतिनिधिलाई विद्युतीय उपकरणबाट मतदानका लागि आवश्यक प्रशिक्षण प्रदान गरिएको छ ।