हुम्ला ।  हुम्लाको सर्केगाड गाउँपालिकामा व्यापक अनियमितता भएको पाइएको छ । 

सर्केगाड गाउँपालिकाले आर्थिक वर्ष २०७९/८० मा  ७३ लाख रुपैयाँ भन्दा बढी आवश्यक कागजात बिनै भुक्तानी दिएको रहस्य खुलेको छ । महालेखा परीक्षकको कार्यालयको वार्षिक प्रतिवेदनमा बिलबिजक बिना नै भुक्तानी दिइएको औँल्याइएको छ । 

पालिकाले आर्थिक कार्यविधि तथा वित्तीय उत्तरदायित्व नियमावली २०७७, को नियम ३९ (५) मा विपरीत त्यो आर्थिक वर्षमा ७३ लाख १३ हजार ३ सय रुपैयाँ भुक्तानी दिएको प्रतिवेदनमा उल्लेख छ । 

घरभाडा बापत  एक लाख ९६ हजार ५ सय ६०,  बैठक भत्ता   ४० हजार, राहत वितरण १ लाख ३५ हजार, इन्धनमा ३५ हजार, कार्यालय सामान खरिदमा १ लाख, अनुगमन भत्ता २ लाख र विद्युतीय सामग्री खरिदमा ३ लाख ९० हजार  रुपैयाँसहित अन्य विभिन्न कार्यको भन्दै बिला बिना नै खर्च गरिएको खुलेको छ। 

यसैबीच, सिमकोट गाउँपालिका– १ र २ को ठेहे गाउँस्थित पञ्चमुखी आधारभूत विद्यालयमा अध्ययनरत विद्यार्थीलाई व्यक्तिगत सरसफाइबारे प्रशिक्षण दिइएको छ । 

सबैका लागि दिगो खानेपानी, सरसफाइ र स्वच्छता परियोजनाले मङ्गलबार विद्यालयमा एक कार्यक्रमको आयोजना गरी विद्यार्थीहरुलाई सरसफाइबारे प्रशिक्षण दिएको हो । कक्षा ५ सम्म अध्यापन हुने  त्यो विद्यालयका हरेक विद्यार्थीलाई एउटा  हातधुने साबुन पनि वितरण गरिएको थियो ।