काठमाडौँ । संविधानका केही प्रावधान संशोधन गर्ने प्रतिनिधिसभाका ठूला दल नेपाली कांग्रेस र नेकपा एमालेको सहमतिलाई राष्ट्रिय प्रजातन्त्र पार्टी (राप्रपा) ले पनि सकारात्मक मानेको छ । 

राप्रपाले मुलुकको राजनीतिलाई स्थायित्व दिन कांग्रेस र एमालेबीच हुन लागेको सत्ता गठबन्धनलाई सकारात्मक मान्दै संविधान संशोधनप्रति समर्थन जनाएको हो ।  पछिल्लो राजनीतिक घटनाक्रमबारे छलफल गर्न राप्रपाले मंगलबार केन्द्रीय पदाधिकारी बैठक राखेको थियो । बैठकपछि अध्यक्ष राजेन्द्र लिङ्देनले संविधान संशोधनका लागि मुख्य दल र दोस्रो दल मिलेर सरकार निर्माण गर्ने सहमति हुनु प्रारम्भिक रुपमा स्वागतयोग्य भएको बताउनुभयो । 

राप्रपाले लामो समयदेखि यो संविधानले काम गर्न सक्दैन र संशोधन गर्नुपर्छ भन्दै आएको अध्यक्ष लिङ्देनको भनाई छ । ‘ ‘यहीबेलामा नेपाली कांग्रेस र एमालेले नयाँ सहमति बनाएको समाचार आइरहेको छ’ उहाँले भन्नुभयो– ‘त्यो सहमतिको मूल प्वाइन्ट भनेको संविधान संशोधन रहेको छ, संविधान संशोधनका लागि मुख्य दल र दोस्रो दल मिलेर सरकार निर्माण गर्ने सहमति हुनु प्रारम्भिक रुपमा स्वागतयोग्य हो ।’

अध्यक्ष  लिङ्देन  दुई दलबीचको समझदारी कसरी अगाडि बढ्छ ? संविधान संशोधनको प्रक्रिया कसरी अगाडि बढ्छ ? भन्ने विषयमा आफूहरु प्रतीक्षारत रहेको उल्लेख गर्नुभयो । दुई दलबीचको सहमतिले ठोस आकार ग्रहण गरेपछि मात्र आफूहरुले  गठबन्धनप्रति पार्टीको धारणा बनाउने उहाँले बताउनुभयो । 

‘बाहिर सतहमा आएका विषय साँच्चिनै सहमतिका विषय हुन् कि होइनन्, त्यसमा कांग्रेस एमाले सहमत छ कि छैन त्यो देखिसकेपछि मात्र हाम्रो धारणा बनाउँछौं’ उहाँले भन्नुभयो– ‘ ‘यो सहकार्य ३ वर्षसम्म जान्छ भन्ने आम मानिसलाई लाग्न सक्छ, तर यो ६ महिनापछि परिवर्तन हुन पनि सक्छ ।